Գուպայի եկեղեցին կը յուսայ որ Պենետիկտոս ԺԶ Քահանայապետի Գուպա կատարելիք յառաջիկայ Առաքելական Ճամբորդութիւնը նպաստէ քաղաքական բանտարկեալներու ազատագրումին։

Ի լուր Պենետիկտոս ԺԶ Քահանայապետի Գուպա կատարելիք Առաքելական Ճամբորդութեան 2012-ին, կարտինալ Օսքար Մարատիակայ նախագահը միջազգային Գարիթասի, փափաք յայտնեց որ համայնավար կղզին լայն բանայ իր դռները ու ազատ արձակէ քաղաքական բոլոր բանտարկեալները ու վերջ տայ բռնութիւններուն։ Ան յիշեցուց Յովհաննէս Պօղոս Բ Քահանայապետի 1998-ին Գուպա կատարած Առաքելական ճամբորդութիւնը, որուն ընթացքին երջանկայիշատակ քահանայապետը ըսած էր. ''Թող Գուպան բացուի աշխարհին ու աշխարհը բացուի Գուպային''։
2003-ին Ս. Աթոռը Գուպայի իշխանութենէն խնդրած է բարեգթութեան ներգործութիւն մը կատարել հանդէպ այլախոհներուն։ 2008-ին Վատիկանի Պետական Քարտուղարը Կարտինալ Պերթոնէ այցելեց Գուպայի նախագահ Ռաուլ Գասթրոյին, եւ այդ առթիւ Հավանայի իշխանութիւնը ազատ արձակեց խումբ մը բանտարկեալներ,թոյլատրելով միաժամանակ խումբ մը աքսորեալներու մուտքը հայրենիք։