Святы Айцец скіраваў пасланне на Дзень міру 2012 г. (сінтэз)
16 снежня было апублікавана
пасланне Святога Айца на Дзень міру, які будзе адзначацца 1 студзеня. Сёлета яно адрасавана
асаблівым чынам да моладзі, бацькоў, сем’яў і ўсіх, хто працуе ў галіне выхавання
і адукацыі, а таксама лідэраў ў розных сферах: рэлігійнай, грамадскай, палітычнай,
эканамічнай, культурнай, сродкаў масавай інфармацыі. Пасланне складаецца з уступнай
часткі і пяці наступных пунктаў, кожны з якіх мае сваю тэму: зварот да выхавацеляў;
выхаванне да праўды і свабоды; адукацыя ў сферы юстыцыі; выхаванне да міру; узняць
вочы да Бога.
Ва ўступе адзначаецца, што адукацыя з’яўляецца і правам (універсальным
і не залежным ад гендэрнага, рэлігійнага або сацыяльнага становішча), і абавязкам
(бацькоў, грамадства і адрасатаў адукацыйнага працэсу). Сапраўднае выхаванне – гэта
“выхаванне ў праўдзе і свабодзе”, крыніцай якога з’яўляецца Бог. Гэта ўключае ў сябе,
па сутнасці, адукацыю да адказнага выкарыстання свабоды, якая мае “вырашальнае значэнне
для распаўсюджвання справядлівасці і міру, якія патрабуюць павагі да сябе і іншых”.
У
пасланні адзначаецца, што бацькі з’яўляюцца першымі педагогамі: сям’я – гэта “першая
школа” выхавання ў сферы справядлівасці і міру. Адказныя за адукацыйныя ўстановы маюць
абавязак забяспечыць, каб дзеці маглі атрымліваць адукацыю згодна з прынцыпамі сумлення,
якія вызначыла іх сем’я. Палітычныя лідэры павінны працаваць над тым, каб гарантаваць
доступ да адукацыі, падтрымліваць сем’і і адукацыйныя ўстановы ў іх місіі і забяспечыць,
каб сем’і мелі магчымасць і права выбраць тыя ўстановы, якія яны лічаць найбольш адпаведнымі
для сваіх дзяцей. (1)
У сваім пасланні на Дзень міру Бэнэдыкт XVI звяртае ўвагу
на тое, што справядлівасць з’яўляецца ні проста вынікам дамоўленасці паміж людзьмі.
Крытэрый справядлівасці – гэта цэласнае бачанне чалавека. Такое бачанне дазваляе нам
адмовіцца ад “дагаворнай” канцэпцыі справядлівасці і дае магчымасць убачыць справядлівасць
на гарызонце салідарнасці і любові. (2)
“Для таго, каб быць сапраўднымі міратворцамі,
- звяртае ўвагу Папа - мы павінны выхоўваць сябе ў спагадзе, салідарнасці, сумеснай
працы, братэрстве, мець актыўную грамадскую пазіцыю, паводле сумлення вырашаць нацыянальныя
і міжнародныя пытанні і шукаць адэкватныя механізмы размеркавання багацця, падтрымання
росту, супрацоўніцтва ў мэтах развіцця і рашэння канфліктаў”.
“Мір для ўсіх
з’яўляецца плёнам справядлівасці кожнага, і ніхто не можа ўхіляцца ад гэтай найважнейшай
задачы садзейнічання справядлівасці, у адпаведнасці са сваёй кампетэнцыяй, робячы
гэта адказна”. (3)
Папа звярнуў таксама ўвагу на ролю СМІ ў працэсе выхавання.
“У сучасным грамадстве, - напісаў Пантыфік - сродкі масавай інфармацыі граюць асаблівую
ролю: яны не толькі інфармуюць, але таксама фарміруюць дух сваёй аўдыторыі, і таму
яны могуць унесці істотны ўклад у выхаванне моладзі. Важна ніколі не забывацца, што
сувязь паміж выхаваннем і камунікацыяй надзвычай моцная: выхаванне адбываецца пасродкам
адносін, якія могуць станоўча або адмоўна ўплываць на фарміраванне асобы”.
Святы
Айцец звярнуўся таксама да моладзі. “Маладыя людзі таксама павінны мець мужнасць жыць
тымі ж высокімі стандартамі, якія самі ўстанаўліваюць для іншых. - напісаў Папа -
На іх ляжыць вялікая адказнасць. Няхай яны знойдуць сілы, каб добра і разумна выкарыстаць
сваю свабоду. Яны таксама нясуць адказнасць за сваё выхаванне, у тым ліку да справядлівасці
і міру”.
Пасланне завяршае заклік Святога Айца да маладых людзей не паддавацца
апатыі, не шукаць лёгкіх рашэнняў складаных праблем. “Не бойцеся выбіраць шляхі, якія
патрабуюць вернасці і сталасці, сціпласці і адданасці справе. Будзьце ўпэўненыя ў
сваёй маладосці і сваім глыбокім жаданні шчасця, праўды, прыгажосці і сапраўднай любові!
Жывіце поўным жыццём, пазначаным энтузіязмам”, - напісаў Бэнэдыкт XVI у заключэнні
свайго паслання на сёлетні Дзень міру.