Святы Айцец скіраваў пасланне да Прэзідэнта Кот д’Івуара
16 снежня арцыбіскуп
Аброзэ Мадта, Апостальскі нунцый у Кот-д’Івуары, перадаў пасланне Бэнэдыкта XVI Прэзідэнту
краіны Аласану Уатара. Папа звяртаецца з просьбай аб міласэрднасці да палітзняволеных,
вялікая колькасць якіх з’явілася як вынік паслявыбарчага крызісу ў краіне. Размова
нунцыя з кіраўніком дзяржавы працягвалася каля сарака хвілін. Выступаючы пасля сустрэчы
перад журналістамі, арцыбіскуп Мадта сказаў, што пасланне Пантыфіка ўтрымлівае надзею
на міласэрнасць адносна членаў папярэдняга кіраўніцтва, якія знаходзяцца ў турме на
поўначы краіны.
Апостальскі нунцый павіншаваў Аласана Уатара з вынікамі парламенцкіх
выбараў 11 снежня і выказаў заклапочанасць Святога Пасаду нападамі на касцёлы і манаскія
дамы.
Прэзідэнт, у сваю чаргу, заявіў, што пытанне палітзняволеных будзе вырашацца
з прэм’ер-міністрам і адпаведнымі міністэрствамі. Што тычыцца культавых будынкаў,
кіраўнік Кот д’Івуара паведаміў, што ўрад ужо прыняў неабходныя меры для арганізацыі
бяспекі, асабліва ў сувязі з урачыстасцю Божага Нараджэння і Новым годам.