Mesazhi i Papës për Ditën Botërore të Paqes: guxim, të rinj, Kisha ka besim tek ju.
Shikojeni me guxim ardhmërinë, pavarësisht nga vështirësitë: është inkurajimi i Papës,
drejtuar të rinjve të mbarë botës, përmes Mesazhit të Ditës së 45-të Botërore të Paqes,
botuar sot. Dita kushtuar paqes do të kremtohet, si zakonisht, më 1 janarin e ardhshëm.
Tema e dokumentit, paraqitur sot paradite në Sallën vatikanase të Shtypit, është:
“Të edukohen të rinjtë me frymën e drejtësisë e të paqes”. Papa ripohon rëndësinë
e familjes dhe të edukimit, për sigurimin e paqes së vërtetë. E i porosit të rinjtë
të ruhen nga relativizmi, që përbën një kërcënim serioz në përdorimin e lirisë.
Mos
kini frikë të impenjoheni për një ardhmëri të ndritur, që u përket të gjithëve! Janë
të rinjtë, protagonistët e Mesazhit të Benediktit XVI për Ditën Botërore të Paqes.
Atyre u drejtohet me fjalë shprese e inkurajimi: “Nuk jeni kurrë vetëm. Kisha ka besim
tek ju, ju ndjek e ju jep zemër, duke ju krijuar të gjitha mundësitë për ta takuar
Jezu Krishtin”. Papa i njeh mirë shqetësimet e shprehura nga shumë të rinj këto
kohët e fundit, ndër zona të ndryshme të botës. Ka rëndësi, shkruan prandaj, që përpjekjet
për të mbrojtur idealet e bukura të moshës suaj, të ndiqen me vëmendje nga mbarë shoqëria.
Kisha, pohon Papa, i shikon të rinjtë plot shpresë e u jep zemër të kërkojnë të vërtetën
e të mbrojnë të mirën e përbashkët. Benedikti XVI i fton të rinjtë e mbarë botës ta
shikojnë me më shumë shpresë ardhmërinë dhe u kujton se nuk janë ideologjitë ato,
që do ta shpëtojnë botën, por Hyji i gjallë, i cili është dashuri. Mos e humbisni
shpresën përballë vështirësive, i nxit të rinjtë Papa, e mos ecni në rrugën e verbër,
që shpesh paraqitet si rruga më e lehtë për zgjidhjen e problemeve. Ati i Shenjtë
u kërkon të rinjve të jenë shembull e nxitje për të rriturit, me qëndrimin e tyre
të drejtë e luftarak kundër padrejtësive e korrupsionit. E i nxit edhe udhëheqësit
politikë të jenë modele figurash të pastra të një politike, që vihet me të vërtetë
në shërbim të të gjithëve. Mesazhi prek edhe problemet e krizës së sotme ekonomike,
që vijon t’i shtrijë rrënjët në mbarë botën, duke shpjeguar se shkaqet e saj janë,
mbi të gjitha, kulturore e antropologjike. Kujton, më pas, se vitin e fundit, njerëzit
ndjehen gjithnjë më të zhgënjyer, në të gjitha drejtimet. I fton, prandaj, ta shikojnë
më me besim vitin 1912, që po troket tashmë në të gjitha portat. Familja dhe
edukimi janë dy bazat kryesore, nga të cilat duhet të rinisemi, porosit Papa, duke
i nxitur prindërit të mos dëshpërohen, pavarësisht nga shqetësimet për të ardhmen,
që nuk mungojnë e që, gjithnjë më shpesh, e shpërbëjnë familjen. Benedikti XVI vë
theksin edhe mbi kushtet e punës, të cilat shpesh nuk përkojnë fare me nevojat dhe
përgjegjësitë familjare. E edhe mbi shqetësimet për të ardhmen e ritmet e ethshme
të jetës. Prej këndej, u drejtohet atyre, që përgjigjen për fatet e njerëzimit, duke
u kërkuar t’i ndihmojnë konkretisht familjet dhe institucionet edukative. E shton:
nuk duhet të mungojë kurrë ndihma për atësinë e amësinë. Përsa u përket institucioneve
edukative, lexohet në mesazh, duhen krijuar të gjitha mundësitë, që familjet t’i zgjedhin
lirisht ato, të cilat janë më të përshtatshme për fëmijët e tyre. E akoma: Ati i Shenjtë
kërkon të favorizohet bashkimi i familjeve të ndara për shkak të mungesës së mjeteve
ekonomike. Së fundi, i bën thirrje botës së mjeteve të komunikimit të japë kontributin
e saj edukativ.Mesazhi, pastaj, thekson nevojën e edukimit të breznive të reja me
frymën e drejtësisë e të lirisë. Njeriu, shkruan Papa, e ka në zemër etjen e pashuar
për amshim, sepse është krijuar në ngjashmëri e sipas shembëlltyrës së vetë Zotit.
E vëren, në vijim, se vetëm në lidhje me Zotin njeriu mund ta kuptojë edhe domethënien
e lirisë së vet. Ky, saktëson, nuk është detyrim, që lind nga një premtim, e as sundim
mbi vullnetin e lirë. Prej këndej, Papa i fton të rinjtë të ruhen nga dashuria e
tepruar për vetveten, nga relativizmi i tepruar, që të shtyn të mos pranosh asgjë
përfundimtare e ta matësh gjithë botën me kutin e vetvetes e të dëshirave vetjake.
Përdorimi i drejtë i lirisë, shton Papa, ka rëndësi të dorës së parë, kur është fjala
për mbrojtjen e drejtësisë e të paqes. Edukimi me frymën e drejtësisë është më se
i domosdoshëm në një botë, e cila gjithnjë më shumë shikon vetëm dobinë, përfitimin,
pasjen, kujton Papa, e thekson se sot disa nga rrymat e kulturës moderne, të mbështetura
nga parime ekonomike racionalistike e individualiste e shkëpusin konceptin e drejtësisë,
nga rrënjët e tij transhendente. Paqja, shkruan Papa, është fryt i drejtësisë dhe
pasojë e dashurisë së krishterë. Është dhuratë e Zotit, por edhe vepër e njeriut,
që duhet ta ndërtojë me duart e veta. Për të qenë veprimtarë të vërtetë të paqes,
përfundon Mesazhi, duhet t’i edukojmë të rinjtë, e edhe mbarë shoqërinë, me frymën
e dhembshurisë, të solidaritetit, të bashkëpunimit, të vëllazërisë, të jemi vigjilentë
e aktivë në bashkësi e t’i zgjojmë ndërgjegjet e përgjumura, kur është fjala për çështjet
themelore kombëtare e ndërkombëtare.