சனவரியை வறுமை விழிப்புணர்வு மாதம் என்று கொண்டாட அமெரிக்க ஆயர் பேரவை முடிவு

டிச.15,2011. வறுமையில் வாடும் பல குடும்பங்களின் போராட்டங்களிலும், துன்பங்களிலும் ஒன்றிணைவதன் மூலம் அவர்களது நம்பிக்கையிலும் பங்கேற்பதே நமது கடமை என்று அமெரிக்க ஆயர் ஒருவர் கூறினார்.
புத்தாண்டின் முதல் மாதமான சனவரியை வறுமை விழிப்புணர்வு மாதம் என்று கொண்டாட அமெரிக்க ஆயர் பேரவை முடிவு செய்திருப்பதை செய்தியாளர்களிடம் எடுத்துரைத்த வறுமை ஒழிப்பு அவையின் தலைவரும், Sacramento ஆயருமான Jaime Soto இவ்வாறு கூறினார்.
சனவரி முழுவதும் நடைபெறும் இவ்விழிப்புணர்வு மாதத்தின் செயல்பாடுகள் வழியாக அமெரிக்காவில் வறுமையில் வாடுவோர் குறித்து புள்ளி விவரங்கள் தெளிவாக்கப்படும் என்று ஆயர் எடுத்துரைத்தார்.
வேற்று நாடுகளில் இருந்து அமெரிக்காவில் குடியேறியுள்ள குடும்பங்களை இந்நாட்டின் சமுதாயத்துடன் இணைப்பது, கருவுற்றுள்ள ஒவ்வொரு பெண்ணும், அவரது கருவில் வளரும் குழந்தையும் இவ்வுலகை ஒரு பாதுகாப்பான இடமாக நோக்குவதற்கு உரிய நம்பிக்கையைத் தருவது, பிறரன்பு சேவை என்பதே நம் சமுதாயத்தின் நல அளவு என்பதை வலியுறுத்துவது ஆகிய செயல்பாடுகள் இம்மாதத்தில் மேற்கொள்ளப்படும் என்று ஆயர் விவரித்தார்.