Natyra është mrekulli e Zotit, që njeriu është përpjekur ta njohë në jetë të jetëve.
Dalëngadalë, ai zbulon një kënd më shumë, shtyhet një metër më tej, thellohet në risi,
të pamenduara më parë. Por Hyji i Gjithpushtetshëm e ka vendosur që në fillim farën
e zbulimeve të ardhshme, në mendjen e krijesës së vet. Kjo është arsyeja, që shkencëtarët
teorikë janë gjithnjë një hap përpara në krahasim me praktikën. Gjithsesi, vjen dita
kur edhe teoritë vërtetohen nga praktika. Dita e djeshme qe njëra prej tyre. Në laboratorin
CERN të Gjenevës, nën udhëheqjen e dy fizikanëve italianë, është kryer një eksperiment
i dyfishtë, gjatë të cilit është gjetur gjurma e “bozonit të Higsit”, grimcës elementare,
që sipas teorisë së Higsit, duhet të jetë e pranishme në bërthamat e atomeve të të
gjitha elementeve të natyrës. Cilat janë pasojat e kësaj pune shkencore? Të dëgjojmë
atë Gabriele Xhontin, astronom i “Observatorit të Vatikanit”: Në teorinë e
grimcave elementare kemi një model, që quhet “Standart” dhe përshkruan të gjitha bashkëveprimet
e njohura në natyrë. Në të realizohet unifikimi i fushës elektromagnetike me atë të
forcave të dobta bërthamore. Ky model është parashikuar prej kohësh teorikisht, por
grimcat e këtij bashkëveprimi elektro të dobët u zbuluan vetëm në vitin 1984 nga fizikani
italian Karlo Rubia, në Cern. Masa e tyre jepet nga bozoni i Higsit. Grimcat, të cilave
ky bozon u jep masën pra, u zbuluan, por nuk është zbuluar akoma vetë “bozoni i Higsit”,
prandaj eksperimentet në Cern vazhduan. Cilat janë perspektivat, pas ditës
së djeshme? Ndryshon fizika? Jo, kjo është puna. Thjesht konfirmohet edhe një
herë modeli elektro i dobët. Nuk ka akoma asnjë sinjal se do të kemi fizikë të re. Gazetat
kanë tituj mjaft bombastikë, si: “u gjet gjurma e grimës së Zotit”. Tepër… Po.
Një nga arsyet për të cilat quhet “grimca e Zotit” është sepse nuk mund të gjendej:
kanë kaluar vjet që nga 1984-a e deri më sot. Shumë studentë i kanë bërë tezat e diplomës
në Cern, duke dashur të arrijnë tek kjo grimcë, por nuk e kanë gjetur. Prandaj, modelet
teorike që kemi, nuk janë verifikuar akoma e nuk e marr vesh pse thonë se “shkenca
arrika të kuptojë gjithçka”, kur nuk jemi të sigurtë as për vërtetësinë e modeleve
teorike…