Papa do të kryesojë lutjen mbrëmësore me universitarët e Romës
Nesër, në orën 17.30, në Bazilikën e Shën Pjetrit, Papa Benedikti XVI do të takojë
bashkësinë universitare të Romës për lutjet mbrëmësore. Ky kremtim tradicional, sivjet
ka si temë: “Fytyrën tënde kërkoj o Hyj. Çështja e Zotit sot”. Priten rreth 10 mijë
studentë, që do të festojnë edhe 20-vjetorin e themelimit të Zyrës dioqezane për baritorinë
universitare, sipas dëshirës së të Lumit Gjon Pali II, në vitin 1991. Përveç të
rinjve, Papën do ta presë kardinali-vikar i Romës, Agostino Valini e do ta përshëndesin
rektori i Universitetit “LUISS” dhe një studente e mjekësisë nga Universiteti “La
Sapienza”. Në lutje do të marrin pjesë edhe ministra italianë, së bashku me rektorët,
autoritetet akademike të universiteteve romake dhe drejtuesit e qendrave kërkimore-shkencore.
Kremtimi do të shoqërohet nga Kori ndëruniversitar, nga orkestra e Konservatorit të
Shën Çeçilies dhe nga koret e kapelanive. Në bazilikë do të jenë të pranishëm edhe
150 të rinj universitarë, që përgatiten për Sakramentin e Krezmimit. Nga Spanja,
do të mbërrijë në Romë ikona e Zojës – “Sedes Sapientaie”, e cila ndodhet në Madrid,
që nga Dita Botërore e Rinisë. Në fund të lutjes mbrëmësore, delegacioni universitar
spanjoll do t’ia dorëzojë ikonën delegacionit të universitetit “La Sapienza”. Me këtë
akt, fillon shtegtimi i saj në kapelanitë universitare të kryeqytetit italian, që
do të përfundojë me Simpoziumin ndërkombëtar të pedagogëve të universitetit, në program
në Romë, nga 21 deri më 23 qershor 2012.