Loreto kremtoi Solemnitetin e Ardhjes së Shtëpisë Shenjte.
Sot paradite në Shenjtëroren mariane të Loretos, u kremtua një Meshë solemne në të
cilën, si çdo vit, morën pjesë shumë besimtarë. Ndërmjet tyre, edhe përfaqësi të shumta
të Armës së Aviacionit ushtarak. Kujtojmë se Zoja e Loretos është Pajtore e Aviacionit. Sipas
traditës, Shtëpia e Zojës në Nazaret, e përbërë nga tre mure të thjeshta guri, mbështetur
në hyrje të një shpelle të zgavruar në shkëmb, pas dëbimit të të krishterëve nga Palestina
nga ana e myslimanëve, u shpëtua prej rrënimit të sigurtë e përfundimtar dhe, në vitin
1291 u mbart në Tersat, në Kroacinë e sotme; ndërsa më 10 dhjetor 1294, pas një mbartjeje
të dytë, u vendos në Loreto, ku vijon të jetë edhe sot. Kur flasim për Shtëpinë
Shenjte, për këto tre mure misterioze, duhet të kujtojmë gjithnjë se ajo, që tradita
popullore ka menduar, ka besuar e ka dashur deri tani, bëhet gjithnjë më tepër një
realitet historik e arkelologjik. Jemi, pra, para Shtëpisë së vërtetë të Nazaretit,
gjë që na e forcon edhe më shumë mahnitjen para këtij vendi, prej nga vjen mesazhi
i heshtur i Marisë, që i ndryshoi rrjedhën historisë së njerëzimit! Në shtëpinë
e vogël të Nazaretit, nën strehën e Marisë, në çastin kur Ajo iu përgjigj "po" ëngjëllit,
filloi ngjarja më e madhe që ka njohur ndonjëherë njerëzimi. Në jetën njerëzore nisi
të banojë vetë Zoti. Zoti u bë njeri. Ç'ngjarje më e madhe mund t'i ndodhte njeriut?
E kjo ngjarje e mahnitshme u kremtua sot, duke kënduar "Magnificat" - "Zemra ime
madhëron Zotin"! që jehoi përsëri ndërmjet mureve të lashta, shoqëruar me lutjen,
drejtuar Nënës së Zotit: "O Mari, në zemrën tënde jeton përgjithnjë kujtimi i ditës
së madhe kur the "Po". Ti kthehesh pambarimisht në shtëpinë e vogël të Nazaretit dhe
mahnitesh përpara Kryeengjëllit Gabriel, që të sjell lajmin se Zoti dëshiron të bëhet
njeri, si ne. E sot ne hyjmë në zemrën tënde, për të shijuar mrekullinë që provove
atë ditë sa të largët, aq të afërt, ditën kur the "po". Dëshirojmë të jetë dita e
"po" sonë, e ta themi së bashku me ty, o Mari!". E, së fundi, kujtojmë se emri
i Loretos lidhet ngushtë me Të Lumen Nënë Terezë. 18 vjeçe, Ajo vendosi të hyjë në
Kongregatën e Motrave Misionare të Zojës së Loretos. Ndërsa duke nisur nga viti 1928,
për më se 20 vjet, dha mësimin e historisë e të gjeografisë në kolegjin e murgeshave
të Loretos në Entali, zona lindore e Kalkutës.