Kardinali Ranjith në Sri Lankë: “Të tërhiqen menjëherë akuzat kundër motrave të Nënë
Terezës”
Kardinali Malkolm Ranjith, kryeipeshkëv i Kolombos, qyteti më i madh i Sri Lankës,
u kërkon mediave kombëtare të tërheqin sa më shpejt akuzat e pabazuara kundër Misionareve
të Dashurisë së Nënë Terezës. Ai vetë nuk do të marrë pjesë në asnjë veprimtari institucionale,
parashikuar për Krishtlindje, derisa të dalë në dritë e vërteta. Por cili është
problemi? Një nga murgeshat e Nënë Terezës, motër Meri Eliza, që drejton një shtëpi
për vajza nënë, akuzohet se “shet fëmijë”. “Misionaret e Prem Nivasës (kështu quhet
shtëpia), nuk kanë shitur asnjëherë ndonjë fëmijë dhe as ia kanë dhënë për birësim
ndonjë çifti të huaj, apo srilankez, pa ndjekur procedurat e parashikuara me ligj”,
deklaron kardinali Ranjith. Funksionarët qeveritarë e kanë kontrolluar disa herë shtëpinë
e motrave, duke gjetur gjithçka në rregull, gjë që e kanë deklaruar edhe zyrtarisht.
Kryeipeshkvi i Kolombos kritikon ashpër gazetat lokale, të cilat flasin për fëmijë
të shitur për para, nga 230 deri në 4.500 euro e madje ngrenë pikëpyetje edhe mbi
faktin se jashtë shtetit birësohen kryesisht fëmijë me të meta fizike, duke aluduar
për mundësinë e trafikut të organeve. “Janë akuza të rënda e të rrezikshme – thekson
kardinali – por krejtësisht të rreme”.