Kalendari i 9 dhjetorit shënon emrin e Shën Sirit, ipeshkëv.
Sipas një gojëdhëne, lindur në Itali, djaloshi që i solli Krishtit bukët e peshqit
në faqen ungjillore të shumëzimit, ishte i pari ipeshkëv i Pavisë, Shën Siri. Legjendën
e gjejmë të shkruar në ‘De Laudibus Papiae”, që i përket vitit 1330. Libri,
shkruar aty nga shekulliVIII, për të vërtetuar se Kisha e Pavisë ishte më e lashtë
se ajo e Milanos, nga e cila varej, na njeh edhe me jetën e Shën Sirit. Sipas këtij
jetëshkrimi, zanafilla e ipeshkvnisë paveze lidhet me Akuilenë, ipeshkvi i parë i
së cilës u shugurua nga Shën Marku ungjilltar. Më pas ishte Ermagora ai, që shuguroi
ipeshkëv Shën Sirin, ardhur në Itali si shoqërues i Pjetrit e i Markut, si dhe Evencin,
të cilët i nisi të ungjillëzojnë Pavinë. Pasi arriti në Pavi, Siri e shtriu veprimtarinë
e tij misionare nga Tiçino në Adigje, duke predikuar në Veronë, Breshia, Lodi e edhe
në Milano, ku Evenci, i ftuar nga Siri, kishte varrosur martirët Gjervazi e Protazi
dhe kishte vënë mbi varrin e tyre një rrasë me epitafin e diktuar nga ipeshkvi i Pavisë.
Mbi rrasë, pas epitafit, shkruhet: SURVS EPC, që u lexua: ‘Siri ipeshkëv’. Këtye
diskutimeve u dha fund princi i arkeologëve të krishterë, Giovani Batista de Rosi,
me dy vëllimet, titulluar ‘Shën Siri, Ipeshkëv i parë e Pajtor i qytetit e i dioqezës
së Pavisë”, duke vërtetuar përfundimisht se Shën Siri nuk jetoi në epokën apostolike,
por në shekullin IV. Ikona më e lashtë e Shenjtit është një basoreliev, dikur polikrom,
që ruhet në Kishën kushtuar Shenjtorëve Gjervazi e Protazi. Shën Siri, pra, ishte
ipeshkëv endacak, që jetoi aty nga shekulli IV. Reliket e tij ruhen në katedralen
e Pavisë.