Бэнэдыкт XVI: мець “простае сэрца”, каб убачыць Бога
7 снежня, падчас агульнай
аўдыенцыі, якая прайшла ў Залі Паўла VI у Ватыкане, Бэнэдыкт XVI прамовіў да вернікаў
катэхезу прысвечаную малітве праслаўлення, часта называнай Гімнам радасці ці Гімнай
радасці Месіі. Святы Айцец нагадаў, што аб гэтай малітве Езуса ўзгадваюць два евангелісты
– св. Мацвей і св. Лука. “Гімн радасці з’яўляецца вяршыняй малітоўнага шляху, які
паказвае глыбокае адзінства Езуса з жыццём Айца ў Духу Святым, у якім праяўляецца
Яго Боскае сыноўства”, - сказаў Пантыфік.
“Кожнае знаёмства паміж людзьмі,
і мы аб гэтым добра ведаем дзякуючы нашым адносінам з іншымі, вядзе да большага ці
меньшага ўдзелу і ўнутранай сувязі з тымі, хто нас ведае ці каго ведаем мы. Нельга
ведаць іншага без адзінства быцця. У Гімне радасці, як і ў іншых малітвах, Езус паказвае
нам, што сапраўднае веданне Бога паходзіць ад адзінства з Ім”.
Папа адзначыў,
што чалавек пачынае сваё знаёмства з Богам толькі будучы ў адзінстве і маючы пастаянны
кантакт з Ім. “Калі я ў адзінстве з Богам, тады ведаю, што сапраўднае веданне аб Ім
мае толькі Яго Адзінародны Сын і толькі Ён можа паказаць нам, хто такі Бог”, - сказаў
Святы Айцец. Папа падкрэсліў, што Езус выказаў сваю радасць, з таго, што воляй Айца
было адкрыць таямніцы не мудрацам, але тым, хто “малы” і мае простае сэрца. “У гэтым
была воля Айца і Яго Сын падзяляе яе і прымае з радасцю”, - сказаў Папа.
“Адсюль
паходзіць заклік, з якім мы звяртаемся да Бога ў малітве “Ойча наш”: “будзь воля Твая,
як у небе так і на зямлі”; разам з Хрыстом і ў Хрысце, таксама і мы просім увайсці
ў сугучча з воляй Айца, і праз гэта таксама становімся Яго сынамі. Таму Езус, у гэтым
Гімне радасці, выражае сваё захапленне ад жадання ўключыць у сваё сыноўняе веданне
Бога ўсіх тых, каго Айцец хоча зрабіць удзельнікамі гэтага – тых, якія прымуць гэты
дар, як “малыя”.
Папа адзначыў, што Езус сам патлумачыў, што азначае быць “малым”,
калі падчас Нагорнай пропаведзі сказаў: “Шчаслівыя чыстыя сэрцам, бо ўбачаць Бога”.
“Чысціня сэрца дазваляе распазнаць аблічча Бога ў Езусе Хрысце і мець сэрца простае,
як у дзяцей, без прэзумпцыі тых, хто закрываецца ў самім сабе, думаючы, што яму ніхто
непатрэбны, нават Бог”, - адзначыў Святы Айцец.
Ён заўважыў, што ў Евагеллі
паводле Мацвея прычынай радасці з якой Езус звярнуўся да Айца, было тое, што негледзячы
на адчужэнне і непрыняцце яго слоў, існавалі тыя “малыя”, якія адкрыліся на дар веры
ў Яго. Таксама і св. Лука прадстаўляе Гімн радасці ў сувязі з момантам абвяшчэння
Евангелля. “72 вучні вяртаюцца поўныя радасці, бо іх місія была паспяховай; яны ўпэўніліся
ў тым, што моцай слова Езуса, зло, якое чыніў чалавек, было пераможана. І Езус падзяляе
з імі задавальненне: “у гэты момант Ён напоўніўся радасцю”.
Папа падкрэсліў
таксама, што ў Евангеллі паводле Мацвея Езус заклікае ісці за Ім, які з’яўляецца сапраўднай
мудрасцю, “ціхім і пакорным сэрцам”. “Ён прапануе нам “свой цяжар”, шлях мудрасці
Евангелля, які не з’яўляецца навучаннем, што трэба вывучыць або этычнай прапановай,
але Асобай, якую трэба наследаваць: Яго самаго, Адзінароднага Сына ў дасканалай еднасці
з Айцом.
Папа заклікаў прысутных на аўдыенцыі вернікаў мець простае сэрца і
быць “убогімі духам”, каб убачыць, што мы не самадастатковыя, што не можам будаваць
наша жыццё самі, але маем патрэбу ў Богу, маем патрэбу сустрэць Яго, слухаць і размаўляць
з Ім.