Benedikti XVI do të kryesojë një Meshë solemne për Amerikën Latine.
Kremtimi i festës së Virgjërës së Guadalupes dhe pavarësia e vendeve latinoamerikane:
këto janë arsyet, për të cilat Papa Benedikti XVI do të kryesojë një Meshë solemne,
të hënën e ardhshme, më 12 dhjetor, në orën 17.30, në Shën Pjetër. Mesha është organizuar
nga Komisioni Papnor për Amerikën Latine, me pjesëmarrjen e kardinajve dhe ipeshkvijve
të vendeve të ndryshme të zonës, si edhe të personaliteteve politike e diplomatëve
nga Spanja, Portugalia, SHBA-të dhe Kanadaja. Para Meshës, disa të rinj latinoamerikanë
do të përshkojnë Bazilikën e Vatikanit me flamujt e tyre kombëtarë e do të nderojnë
figuren e Zojës së Guadalupes në elter. Mbi rëndësinë e kësaj meshe, folëm me sekretarin
e Komisionit Papnor për Amerikën Latine, prof. Guzmàn Carriquiry: Është një
gjest i madh përzemërsie nga ana e Papës për Amerikën Latine, është nxitje për Kishat
e atij kontinenti. Sigurisht, Amerika Latine vuan nga plagët e dhunës, të trafikut
të drogës, të pabarazisë, të sulmeve kundër familjes, por nuk është vetëm kjo: Amerika
Latine përjeton edhe një çast të volitshëm zhvillimi të madh ekonomik, kapërcimi të
varfërisë, protagonizmi në skenën ndërkombëtare. Mendoj se sfidat e Kishës në Amerikën
Latine janë të jashtëzakonshme, por më e madhja është gjithnjë brenda saj. Sfida më
e madhe për Kishën është mikpritja, pranimi, kremtimi, përjetimi e komunikimi i trashëgimisë
së madhe fetare, që Provania Hyjnore u ka dhënë popujve të Amerikës Latine. Në këtë
kuptim, Mesha e 12 dhjetorit, në festën e Zojës sonë të Guadalupes – “Pedagogja” e
fesë, e inkulturimit të fesë në zemrën e popujve tanë, Ylli i ungjillëzimit të ri
– do të na ndihmojë ta realizojmë në jetën e njerëzve atë, që e besojmë me fe, por
edhe e dëshmojmë përmes përvojës historike e personale të latinoamerikanëve, që tregon
se Krishti arrihet përmes Marisë. Mendoj se kjo Meshë e 12 dhjetorit do t’u kujtojë
latinoamerikanëve ta rijetojnë, ta aktualizojnë sërish vetëdijen e së vërtetës, të
dinjitetit, të arsyes e të bukurisë së qënies të krishterë. Gjatë Meshës së
12 dhjetorit do të ekzekutohen edhe disa këngë kreole. Cili është kuptimi i këtij
aspekti liturgjik? Në marrëveshje me Mjeshtrin e Kremtimeve Papnore, Kyrie,
Gloria, Sanctus dhe Agnus Dei do të merren nga muzika e Ariel Ramirez, kompozitor
argjentinas, e nga vepra e tij “Mesha kreole – Misa criolla”. Është muzikë kishtare,
me rezonancë të fuqishme latinoamerikane, edhe pse ndihmohet e mbështetet nga përdorimi
i instrumenteve muzikore të Argjentinës së veriut e të zonës andine. Nëse Zoja e Guadalupes
është “Pedagogja” e fesë në Amerikën Latine, pse të mos realizohet një liturgji me
dinjitetin, solemnitetin dhe bukurinë, që do Ati i Shenjtë për çdo liturgji, por njëkohësisht,
pa e ulur këtë dinjitet, solemnitet e bukuri, edhe me një rezonancë latinoamerikane? Parashikohet
të marrin pjesë jo vetëm kardinajt e ipeshkvijtë, që do të vijnë nga Amerika Latine,
por edhe latinoamerikanët, që banojnë në Romë… Po, sigurisht: do të jetë i pranishëm
Trupi Diplomatik i akredituar pranë Selisë së Shenjtë dhe presidenca italiane, rregulltarë
e rregulltare latinoamerikane me eprorët e tyre, që ndodhen në Romë, meshtarë latinoamerikanë,
që studiojnë në Universitetet Papnore. Kemi menduar edhe diçka simpatike për bashkësinë
e emigrantëve latinoamerikanë, që banojnë në Romë. E dimë se shpesh bëjnë punë të
rënda, me orar të zgjatur, prandaj, unë kam shkruar një letër, që u drejtohet punëdhënësve,
duke u kërkuar një gjest mirësie, solidariteti, për t’u lejuar atyre, që e mbajnë
gjallë traditën fetare dhe zjarrin tipik të popullit latinoamerikan, të mungojnë nga
puna, të paktën për kohën e zgjatjes së kremtimit. Kjo do të favorizojë pjesëmarrjen
e tyre në Meshë.