Віцэ-прэзідэнт ЗША: улады Сірыі павінны спыніць гвалтоўныя дзеянні
Дзеянні прэзідэнта
Сірыі Башара Асада пагражаюць распаліць міжрэлігійныя канфлікты не толькі ў яго краіне,
але і ва ўсім рэгіёне, заявіў у Турцыі віцэ-прэзідэнт ЗША Джо Байдэн. “Башар Асад
і яго рэжым – крыніцы нестабільнасці ў Сірыі, якія нясуць у сабе вельмі сур’ёзную
пагрозу, бо яны могуць распаліць полымя міжрэлігійных канфліктаў не толькі ў Сірыі,
але і за яе межамі”, - сказаў Байдэн падчас перамоваў з прэзідэнтам Турцыі Абдулой
Гюлем. Паводле яго слоў, у цяперашні час галоўная задача ЗША і іх саюзнікаў складаецца
ў тым, каб спыніць забойствы грамадзянскіх асоб у Сірыі і дамагчыся адстаўкі Асада.
“ЗША
займаюць выразную пазіцыю па Сірыі. Правячы рэжым Сірыі павінен спыніць гвалтоўныя
дзеянні ў дачыненні да ўласнага народа, а Башар Асад павінен пакінуць сваю пасаду
і тым самым адкрыць шлях да дэмакратычных пераўтварэнняў і выканаць патрабаванні народа”,
- заявіў віцэ-прэзідэнт у інтэрв'ю турэцкім СМІ.
Башар Асад – мусульманін-алавіт,
прадстаўнік рэлігійнай меншасці ў Сірыі. Антыўрадавыя дэманстранты – галоўным чынам
суніты, якія прадстаўляюць рэлігійную большасць у гэтай краіне. Шыіцкі Іран з’яўляецца
галоўным саюзнікам Асада ў рэгіёне.