Liturgjia e Fjalës së Zotit e së Dielës së 2-të të Ardhjes
Ja përsëri në takimin tonë javor të së shtunës me Fjalën e Zotit të së dielës, kësaj
here do të dëgjojmë e meditojmë së bashku leximet biblike të liturgjisë së Fjalës
Hyjnore të dielës së II-të të kohës së Ardhjes, ciklit të dytë, sipas kalendarit liturgjik
të kishës. Koha e Ardhjes është kohë pritjeje. Derisa përkujtojmë ardhjen e parë
të Krishtit në histori, liturgjia e Fjalës së Zotit, na fton të vihemi në perspektivën
e ardhjes së dytë të Mbretërisë së tij Hyjnore. Gjatë pritjes e përgatitjes sonë shpirtërore
për Ardhjen e Krishtit në jetën tonë, si në këtë të diele të dytë po edhe në atë të
tretë të Ardhjes, na ndihmon shembulli e figura e Shën Gjon Pagëzuesit. Ai vazhdon
akoma, në Kishë, misionin e tij të përgatitjes së një populli mirë të prirur ndaj
Krishtit. Përveç thirrjes për t’u kthyer tek Zotit, Gjon Pagëzuesi na mëson si të
identifikohemi e mishërohemi me Fjalën e Zotit. LITURGJIA
E FJALËS Leximi i pare(Is 40, 1-5. 9. 11.) Pas
pesëdhjetë vjetësh mërgimi Hyji e çon popullin e zgjedhur në tokën e tij duke kryer
një çlirim të ri.Hyji ka shumë ngut për të dërguar popullin e tij drejt lirisë.Dhe shënon një rrugë të drejtë ndërmjet shkretëtirës së lulëzuar.Hyji e
bën ecjen drejt tokës së premtuar pa rreziqe dhe vështirësi të mëdha, duke i zbuluar
popullit se Ai vjen për të jetuar me të.
Lexim prej Librit të Isaisë
profet “Ngushëllojeni, ngushëllojeni popullin tim, thotë Zoti juaj! Flisni
zemrës së Jerusalemit, dhe klithni atij se mori fund skllavëria e tij, u shpërblye
paudhësia e tij, sepse ka marrë prej dorës së Zotit ndëshkim të dyfishtë për të gjitha
mëkatet e veta.” Një zë lëshon kushtrimin: “Në shkretëtirë përgatitni udhën e
Zotit, rrafshoni në stepë shtigjet e Tenzot. Le të ngrihet çdo luginë, le të ulet
çdo mal e kodër, rruga e shtrembër le të bëhet e drejtë, e rrëpirëta le të bëhet e
rrafshtë: do të zbulohet hiri i Zotit, atëherë të gjithë njerëzit së bashku do të
shohin se ka folur goja e Zotit!” Ngjitu mbi një mal të lartë, ti që i sjell lajmin
e mirë Sionit; ngrihe me gjithë fuqi zërin tënd, ti që i sjell lajmin e gëzueshëm
Jerusalemit! Klith të madhe, mos druaj, thuaju qyteteve të Judës: “Ja, Hyji juaj,
qe, Zoti, Hyji juaj, po vjen me fuqi, zotëron krahu i tij: ja, me të është shpagimi
i tij, e para tij shpërblimi i tij! Si bariu e kullot grigjën e vet, në dorë i merr
qengjat, ngrykë i mbart; i këqyr me kujdes.” Fjala e Zotit !
Psalmi
85 (84)
Ref: Na e trego, o Zot,
mëshirën tënde Dhe na jep shëlbimin tënd. _____________
Do të dëgjoj çka thotë Zoti Hyj, ai premton paqe për popullin e vet, për
të dashurit e vet e për ata që me gjithë zemër ktehen. Shpëtimi i tij është afër
atyre që e druajnë, lavdia e tij do të banojë në vendin tonë. _____________
Mëshira dhe e vërteta do të përpiqen, drejtësia e paqja do të merren ngrykë. E
vërteta do të mbijë nga toka e drejtësia do të shikojë prej qiellit. _____________
Sepse Zoti ka për të dhënë çdo të mirë edhe toka jonë do ta japë frytin e vet. Drejtësia
do t’i shkojë përpara dhe do t’u tregojë udhën hapave të tij. _____________
Leximi i dytë(2 Pjt 3, 8-14) Të krishterët e parë
për një gabim të parashikimit të së ardhmes pritnin menjë-herë ardhjen e Zotit.Por Zoti, para se të kthehet, pret përfundimin e historisë njerëzore që ne nuk
e njohim.Për këtë Ai provokon dishepujt e tij të jetojnë konkretisht jetën
e tyre në botë sikur Zoti po vjen tani.Të krishterët janë ata që jetojnë çdo
ditë në mënyrë aktive duke pritur ardhjen e Zotit.
Lexim prej Letrës
së dytë të shën Pjetrit apostull
Një gjë, fort të dashur, assesi s’duhet
ta harroni, e kjo është se te Zoti një ditë është si një mijë vjet, po edhe një mijë
vjet janë si një ditë e vetme. Nuk vonon Zoti ta çojë në vend premtimin, si disa e
mendojnë të ngadalshëm, por është i durueshëm me ju, se nuk do që ndokush të birret,
por do që të gjithë ta kenë mundësinë të kthehen. Dita e Zotit do të vijë si vjedhësi.
Atë ditë qiejtë do të zhduken me krizmë, elementat do të shkrihen prej të nxehtit
dhe toka e veprat në të do të gjenden para Gjyqit. Pasi kështu do të shkatërrohen
të gjitha këto, sa njerëz të mirë duhet të jeni ju të gjithë me jetë të shenjtë, me
përshpirtni, ju që e prisni dhe e shpejtoni ditën e ardhjes se Hyjit, në të cilën
qiejtë do të shkatërrohen me zjarr dhe elementet e botës do të shkrihen prej nxehtësisë.
Ne veç, sipas premtimit të tij, presim qiellin e ri dhe tokën e re, ku banon drejtësia.
Këndej, o të dashur, ju, ndërsa i prisni këto, mundohuni të jeni para tij të panjollë,
të patëmetë, në paqe!
Fjala e Zotit
ALELUJA,Aleluja. Përgatitni udhën e Zotit; rrafshoni shtigjet e tija! Çdo
njeri do ta shohë shëlbimine Hyjit. Aleluja.
VUngjilli(Mk 1, 1-8) Ungjilltari Marku shpall Ungjillin si një “lajm të
mirë” të përjetshëm, drejtuar një populli që pret realizimin e vetë shpresës.Gjon Pagëzuesi i shpall popullit të Izraelit ardhjen e Mesisë: Ai është “zëri”
që thërret në shkretëtirë, aty ku populli i Hyjit maturohet nëpërmjet vështirësive.Ai denoncon gënjeshtrat dhe padrejsitë e njerëzve, dhe shpall se ardhja e Hyjit
kërkon pendesë dhe kthimin e zemrave.
Leximi i Ungjillit të shenjtë
sipas Markut Fillimi i Ungjillit të Jezu Krishtit, Birit të Hyjit. Në
përkim me fjalët që shkruan Isaia profet: “Qe, unë po dërgoj lajmëtarin tim para teje
që do ta bëjë gati udhën tënde; është zëri i njërit që bërtet në shkreti: Bëni gati
udhën e Zotërisë, rrafshoni shtigjet e tija”. Në shkreti u duk Gjon Pagëzuesi
e predikonte një pagëzim pendese për faljen e mëkateve. Mbarë krahina e Judesë e të
gjithë jerusalemasit shkonin tek ai. Pasi ata i rrëfenin mëkatet e veta, Gjoni i pagëzonte
në lumin Jordan. Gjoni ishte i veshur me petk prej leshit të deves e rreth ijësh
kishte brez lëkure. Ushqehej me karkaleca e me mjaltë të egër. Në predikimet e veta
thoshte: “Pas meje po vjen një më i fortë se unë. Unë nuk jam i denjë as të ulem para
tij për t’ia zgjidhur rripin e sandalëve të tija. Unë ju pagëzova me ujë, ndërsa ai
do t’ju pagëzojë me Shpirtin Shenjt.” Fjala e Zotit! Më tepër
mbi liturgjinë e Fjalës së Zotit të dielës së 2-të të Ardhjes, mund të dëgjoni duke
klikuar këtu....