Бэнэдыкт XVI: прыклад мучанікаў – гэта прыклад глыбока свабодных людзей
30 лістапада Бэнэдыкт
XVI скіраваў зварот да членаў XVI адкрытага пасяджэння Папскіх акадэмій, якое адбылося
сёння ў Рыме. Арганізатарам мерапрыемства, якое прайшло на тэму “Сведчанні і сведкі.
Месцы мучаніцтва і вялікія вернікі”, з’яўляюцца Папская Рымская акадэмія археалогіі
і Папская акадэмія “Cultorum Martyrum”. Святы Айцец адзначыў, што тэма гэтага форума
яму асабліва блізкая, бо дае магчымасць паразважаць аб гістарычнасці хрысціянства,
яго сувязі з гісторыяй, якую яно перамяняе дзякуючы евангельскаму зачыну і святасці,
якой жывуць і сведчаць вернікі.
Пантыфік адзначыў, што шматлікія даследванні
ў сферы археалогіі, гісторыі мастацтва і архітэктуры, сведчаць аб тым, што Евангелле
перадаецца праз жывое сведчанне вернікаў. “Абвяшчэнне хрысціянскай навіны, прыгажосці
веры ў Хрыста, патрабуе людзей, якія сваёй жыццёвай пазіцыяй, вернасцю, сведчаннем,
якое часам можа быць звязана з дарам саміх сябе, пакажуць абсалютнае першынства Любові
над любой іншай інстанцыяй”, - сказаў Папа.
Бэнэдыкт XVI звярнуў увагу на тое,
што “калі прыглядзецца да прыкладаў мучанікаў, адважных сведкаў старажытнага хрысціянства,
а таксама шматлікіх сведкаў нашых часоў, у іх можна убачыць глыбока свабодных людзей:
свабодных ад кампрамісаў і эгаістычных прывязанасцяў, свядомых важнасці і прыгажосці
ўласнага жыцця, і менавіта таму здольных любіць Бога і братоў гераічна, ставячы перад
сабой высокую планку хрысціянскай святасці”.
Святы Айцец адзначыў, што менавіта
для таго, каб умацаваць тых, хто хоча спрыяць рэалізацыі новага хрысціянскага гуманізма,
праз даследванні ў сферы археалогіі і гісторыі, ён падтрымлівае прапанову кааардынацыйнай
рады Папскіх акадэмій адносна прысуджэння спецыяльнай прэміі Францішканскаму цэнтру
вывучэння Бібліі ў Іерусаліме і даследчыцам Дарыі Мастрарылі і Цэцыліі Правэрбіо.