Վիլնիւսի մէջ Հայաստանի եւ Լիթուանիայի արտաքին գործոց նախարարներ Էդուարդ Նալպանտեանի
եւ Աուտրոնիուս Աժուպալիսի մասնակցութեամբ՝ Նոյեմբեր 26ին տեղի ունեցած է Լիթուանիայի
մէջ ՀՀ դեսպանութեան պաշտօնական բացման արարողութիւնը, որուն ներկայ էին Լիթուանիայի
խորհրդարանի անդամներ, ԱԳՆ բարձրաստիճան պաշտօնեաներ, հայ համայնքի ներկայացուցիչներ:
Այս առթիւ էդուարդ Նալպանտեան շնորհաւորած է նաեւ լիթուանիահայ համայնքը դեսպանութեան
բացման առնչութեամբ, յոյս յայտնելով, որ լիթուանա-հայութիւնը նոր եռանդով պիտի նպաստէ
հայ-լիթուանական յարաբերութիւններու զարգացման : Իր խօսքին մէջ Լիթուանիայի ԱԳ նախարարը՝
յիշատակելով հայ-լիթուանական պատմական առնչութիւնները, նշած է որ Հայաստանի դեսպանութեան
հիմնումը նոր էջ պիտի բանայ երկկողմ բարեկամական յարաբերութիւններուն մէջ, եւ Լիթուանիայի
իշխանութիւնները առաւելագոյնս պիտի աջակցին դեսպանատան գործունէութեան: ՀՀ պետական
օրհներգի հնչիւններուն տակ՝ Լիթուանիայի մէջ ՀՀ դեսպան Արա Այվազեան բարձրացուցած է ՀՀ
Պետական Դրօշը: Այնուհետեւ Հայ Առաքելական եկեղեցւոյ հոգեւոր հովիւ տէր Խոսրով Ստեփանեան՝
կատարած է դեսպանատան օծման կարգը։