29 лістапада ў Рыме
пачала сваю працу юбілейная пленарная асамблея Папскай рады па справах сям’і. Яна
прысвечана 30-годдзю публікацыі Апостальскай адгартацыі бл. Яна Паўла ІІ “Familiaris
consortio” і заснавання гэтай ватыканскай дыкастэрыі. Да 1 снежня ўдзельнікі асамблеі
будуць разважаць над тэмамі, якія закранае адгартацыя. У сваёй прамове да ўдзельнікаў
старшыня Папскай рады па справах сям’і кардынал Эніо Антанэллі адзначыў, што Ян Павел
ІІ надаў святло і моц сямейнаму душпастырству. У апошнім ажыццяўляецца пакліканне
да любові – здольнасці і адказнасці любіць і быць разам. На думку кардынала Антанэллі,
“будучыня евангелізацыі моцна залежыць ад дамашняга Касцёла”.
Цытуючы “Familiaris
consortio”, дзе сказана, што сям’я базуецца на шлюбе паміж мужчынам і жанчынай і адкрыта
на нараджэнне і адукацыю дзяцей, выключаючы пазашлюбныя сексуальныя адносіны, ватыканскі
іерарх заўважыў, што “Касцёл падвяргаецца крытыцы галоўным чынам з-за свайго навучання
адносна сексуальнасці”.
На яго думку, “любоў, у якой жаданне шчасця, сексуальнае
захапленне, ахвяраванне сябе іншаму і міжперсанальнае адзінства гарманічна спалучаюцца,
з’яўляецца сапраўдным адлюстраваннем Бога”. “Хрысціянская сям’я сёння з’яўляецца галоўным
рэсурсам евангелізацыі”, - падкрэсліў кардынал Антанэллі. Заклікаючы ўдзельнікаў асамблеі
Папскай рады па справах сям’і да плённай працы, іерарх падкрэсліў, што ў цэнтры форуму
павінна знаходзіцца духоўнае жыццё асобы.