Në Siri janë bërë “krime kundër njerëzimit”: ky është denoncimi i Komisionit ndërkombëtar
i hetimit themeluar nga Këshilli i të drejtave njerëzore pranë OKB-së. Menjëherë pas
sanksioneve ekonomike të Lidhjes arabe kundër Sirisë, edhe Bashkimi evropian po përgatitet
për ashpërsimin e masave ndëshkuese kundër Damaskut, sidomos në sektorin e energjisë.
Nga Brukseli bëjnë të ditur se është arritur një marrëveshje paraprake për zgjerimin
e sanksioneve të BE-së në fushën e eksportit të teknologjisë në sektorin e gazit e
naftës që përdorët për veprimtarinë e nxjerrjes, përpunimit e prodhimit. Edhe përkundra
thirrjeve ndërkombëtare, dhuna në vend vazhdon: sipas aktivistëve, së paku 15 vetë
janë vrarë në rajonin qendror të Homs e Hama, në atë veri-perëndimor të Dayr za Zot
e në atë veri-lindor të Kamishli. Agjencia zyrtare njofton për katër ushtarë të vrarë
nga forcat terroriste në Homs, Hama e në lagje të Damaskut. Për herë të parë që
nga fillimi i represionit, Qeveria e Damaskut gjatë një konference shtypi ka shfaqur
një filmim prej disa minutash në të cilin “tregohen pamje të krimeve të bandave terroriste
të armatosura”, gjithnjë sipas burimeve zyrtare të regjimit.