Kostumet tradicionale kosovare në ekspozitë fotografike në Durrës
Kostume tradicionale popullore të trevave të Kosovës janë paraqitur këto ditë në Klubin
e Artit dhe Kulturës, përmes ekspozitës së përgatitur nga fotografi Shkëlzen Rexha
dhe etnografja Borë Balaj. Në 50 fotot e eskpozuara, autorët kanë përzgjedhur foto
të kostumeve nga të gjitha trevat e Kosovës, por edhe nga ato të Shqipërisë. Sipas
fotografit nga Gjakova, Shkëlzen Rexha, fotografitë janë pjesë e katalogut me 170
foto, që u botua dy vjet më parë në Kosovë dhe që janë paraqitur edhe në ekspozitat
e hapura në qytete të Zvicrës, Maqedonisë, Austrisë dhe Gjarmanisë Rexha, i cili
që nga viti 1999 ka promovuar 16 ekspozita personale fotografike, shtoi se kjo ekspozitë
është hapur më parë edhe në qytetet e Korçës, Pogradecit e Fierit si dhe në qytezën
arkeologjike të Apolonisë. Etnografja Borë Balaj, e cila është kujdesur për grumbullimin
e veshjeve të hershme, tha se modelet që kanë pozuar me veshjet tradicionale vijnë
nga Kosova, Shqipëria dhe vende të tjera ku jetojnë shqiptarë. "Ne kemi hulumtuar
veshje të cilat kanë një moshë 150-200 vjeçare dhe përbëjnë vlera të veçanta për larminë
e traditës dhe të kulturës sonë kombëtare", tha Balaj, sipas të cilës, kjo ekspozitë
është një tjetër provë e kulturës materiale të përbashkët të hapësirave tona. Ekspozita
me foto të veshjeve tradicionale është mirëpritur nga vizitorët durrsakë dhe do të
qëndrojë e hapur deri në fund të kësaj jave.