Տիգրան Մանսուրեանի «Ռեքուիեմ»ի Անդրանիկ Ներկայացումը Գերմանիոյ Մէջ. Անիկա Ամբողջ Մէկուկէս Տարի Պիտի Հնչէ Այնտեղ։

Նոյեմբեր 19ին Պեռլինի Ֆիլհարմոնիայի կամերային դահլիճին մէջ կայացաւ Տիգրան Մանսուրեանի` Հայոց Ցեղասպանութեան զոհերու յիշատակին գրուած “Ռեքուիեմ”ի համաշխարհային անդրանիկ ներկայացումը` RIAS կամերային երգչախումբի, Միւնիխի կամերային նուագախումբի, մենակատարներ Քրիստինա Քայզերի (սոփրանօ), էնտրիւ Ռետմոնտի (պարիդոն), խմբավար Ալեքսանդր Լիիպրայխի կատարումով: Համերգի առաջին բաժինին մէջ ականջին ծանօթ Մոցարտի “Ռեքուիեմ”ն էր, որ կատարուեցաւ նոյն կազմով, բայց տարբեր մենակատարներով:
Գերմանական ռատիոն` Deuschlandradio Kultur-ը Նոյեմբեր 20ին բացառիկ կերպով եթեր թողարկեց ոչ միայն համերգը, այլեւ ընդմիջման դադարը յագեցուց Տիգրան Մանսուրեանի հետ հարցազրոյց ներկայացնելով: Համերգի ռատիոհեռարձակման օրը պատահական չէր ընտրուած, “Ռեքուիեմ”ը հնչեց Ծննդեան գիշերուան ընդառաջ Քրիստոսի գալստեան նախորդող չորս կիրակիներուն նախորդող Կիրակին, որ Գերմանիոյ մէջ յայտնի է մեռեալներու յիշատակի Կիրակի անունով, եւ կարելի է երեւակայել, թէ ռատիոունկնդիրները ինչպիսի յուզումով կը սպասէին անոր:
՝՝Երեւանը երբ առիթը կ'ունենայ ունկնդրելու “Ռեքուիեմ”ը՝՝ հարցումին Տիգրան Մանսուրեան սա պէս պատասխանած է: “Պայմանագիր կնքելիս, վստահել եմ հրատարակչիս եւ ստորագրել եմ, որ 1,5 տարի միայն գերմանացիները պիտի հնչեցնեն”, աւելցնելով, թէ RIAS կամերային Երգչախումբն ու Միւնիխի կամերային Նուագախումբը կ’ուզեն գալ Երեւան ու “Ռեքուիեմ”ը կատարել՝հոն Հայաստանի մէջ: