Sot pasdite Papa vizitoi “Vatrën e Paqes e të Gëzimi”, për të cilën kujdesen motrat
e së Lumes Nënë Terezë, misionaret e bamirësisë së Kotonusë. Vijoi, pastaj, vizitën
në famullinë e Shën Ritës, ku u takua me fëmijët beninas. Por, në ç’kushte jetojnë
sot fëmijët e Beninit? Flet ati kapuçin, Egjidio Pikuçi, drejtor i Revistës
misionare "Continenti":
Përgjigje: - Gjendja e fëmijëve në
Benin është tragjike. Ndoshta shumëkush e kujton se, dy vjet më parë, u ndalua një
anije, që nisej nga Kotonu, në drejtim të vendeve të tjera. Ishte plot me fëmijë beninas,
që drejtoheshin nga plantacionet e kakaos ose të kallamit të sheqerit. Ishin shitur.
Pastaj është rasti i fëmijëve të cilët, sapo lindin, akuzohen si shtriganë. E kjo,
sepse kanë ndonjë të metë fizike, ndonjë dhëmb, vesh a sy të shtrembër. Besohet se
fëmijë të tillë kanë sy të keq e i sjellin fatkeqësi familjes dhe vendit ku jetojnë.
Prandaj mbyten menjëherë.
Pyetje: - Në vijën e parë të frontit
për shpëtimin e fëmijëve vijon të jetë Kisha… Përgjigje: - Natyrisht
Kisha, përmes bashkëpunimit të instituteve të ndryshme fetare. Kur rregulltarët marrin
vesh se në ndonjë shtëpi ka lindur një fëmijë, që është në rrezik, vrapojnë ta marrin
e ta strehojnë në shtëpinë e ngritur nga ipeshkvi i N’pdalit, në Veri të vendit, pikërisht
për të strehuar ferishtet, që për shumëkënd janë shtriganë të vegjël. Askush nuk e
di me saktësi ku ndodhen, sepse, po u mor vesh, i kapin përsëri e i zhdukin. Për këtë
situatë janë njoftuar edhe Kombet e Bashkuara të Gjenevës. Përfaqësuesit e Organizatës
në mbrojtje të të drejtave të njeriut mbetën me gojë hapur nga habija, kur dëgjuan
historitë tragjike të ‘shtriganëve të vegjël’. Prandaj mund të themi se kjo vizitë
e Papës lë një gjurmë të thellë. Duke u mbështetur në autoritetin e tij, uroj që
ky problem të bëhet i njohur botërisht e të pasohet edhe nga ndonjë ndërhyrje konkrete
për të ardhmen. E shpresoj se do të ketë edhe të tjerë, që do të bashkëpunojnë me
priftërinjtë, rregulltarët, rregulltaret e besimtarët katolikë për t’i shpëtuar fëmijët
e pafajshëm.