16 നവംമ്പര് 2011, വിയന്ന മദ്ധ്യപൂര്വ്വദേശത്തെ മെത്രാന്മാരുടെ സിനഡു സമ്മേളനത്തിന്
ഒരുക്കമായുള്ള സുറിയാനി സഭകളുടെ ചര്ച്ചാവേദിയില് മാര് ജോസഫ് പവ്വത്തില് പങ്കെടുത്തു. ഓസ്ട്രിയായിലെ
വിയന്നായില് നവംമ്പര് 12-ാം തിയതി ആരംഭിച്ച സുറിയാനി പാരമ്പര്യത്തിലുള്ള കത്തോലിക്കാ–ഓര്ത്തഡോക്ട്
സഭകളുടെ കൂട്ടായ്മ സംഘടിപ്പിച്ച ത്രിദിന ചര്ച്ചാവേദിയിലാണ് colloquium syriacum ചങ്ങനാശ്ശേരി
മുന് അതിരൂപതാദ്ധ്യക്ഷനും, കേരളത്തിലെ സീറോ-മലബാര് സഭയുടെ ആത്മീയാചാര്യനുമായ മാര്
പൗവ്വത്തില് പങ്കെടുത്തത്.
മദ്ധ്യപൂര്വ്വദേശത്തെ പീഡിതസഭ, ഇറാക്കിലെയും സീറിയായിലെയും
ക്രൈസ്തവര്, മദ്ധ്യപൂര്വ്വദേശത്തെ മുസ്ലീം-ക്രൈസ്തവ ബന്ധങ്ങള്, എന്നിവ സമ്മേളനം ചര്ച്ചാവിഷയമാക്കി. മദ്ധ്യപൂര്വ്വദേശത്തെയും
കേരളത്തിലെയും കാല്ഡിയന്, അസ്സീറിയന്, മാരോനൈറ്റ്, സീറിയന്, ലെബനൈറ്റ് എന്നീ പുരാതന
കിഴക്കന് സഭകളുടെ പ്രതിനിധികള് ചര്ച്ചാവേദിയില് പങ്കെടുക്കുകയും വിയെന്നായിലെ വിശുദ്ധ
എഫ്രേമിന്റെ ദേവാലയത്തില് ഒരുമിച്ച് പ്രഭാത-സായാഹ്ന പ്രാര്ത്ഥനകളില് പങ്കെടുക്കുകയും
ചെയ്തു. കേരളത്തിലെ ഓര്ത്തഡോക്സ് സഭകളെ പ്രതിനിധീകരിച്ച് ഉദയഗിരി മെത്രാപ്പോലീത്ത,
മോര് തിയോഫിലോസ് കുര്യാക്കോസും ചര്ച്ചാവേദിയില് പങ്കെടുത്തു.
നവംമ്പര് 12-ന്
ആരംഭിച്ച സമ്മേളനം 14-ാം തിയതി ചൊവ്വാഴ്ച സമാപിച്ചു. പരിശുദ്ധ സിംഹാസനത്തിന്റെ അംഗീകാരത്തോടെ
2009-ല് വിയന്നായിലെ മെത്രാപ്പോലീത്താ കര്ദ്ദിനാള് ക്രിസ്റ്റോഫ് ഷോണ്ബേണിന്റെ നേതൃത്വത്തിലാരംഭിച്ച
പൗരസ്ത്യ സഭൈക്യസംവാദ സംരംഭത്തിന്റെ മൂന്നാം സമ്മേളനമാണ് ഇത്തവണ വിയെന്നായില് അരങ്ങേറിയത്.