Бэнэдыкт XVI: У канцы гісторыі пераможа Хрыстус, любоў і дабро

Сваю сённяшнюю катэхезу, прамоўленую падчас агульнай аўдыенцыі на плошчы св. Пятра, Бэнэдыкт XVI прысвяціў 110 (109) псальму, вядомаму як “валадарскі”. Папа адзначыў, што гэта малітва магчыма першапачаткова была звязана з інаўгурацыяй уладара, але з часам стала святкаваннем Місіі пераможцы, праслаўленага праваруч Бога”.

Псальм пачынаецца словамі, якія ўказваюць на ўдзел валадара ў хвале Бога, Які дапамагае перамагчы ворагаў і робіць яго сведкам сваёй Боскай моцы. “Езус таксама ўзгадвае аб гэтых словах, каб паказаць што Месія большы за Давіда, што ён з’яўляецца Панам Давіда”, - нагадаў Пантыфік. Святы Айцец, аднак, адзначыў, што паміж уладаром, аб якім кажа псальм, і Богам, існуе непарыўная сувязь; яны кіруюць сумесна. Пантыфік падкрэсліў, што такім чынам, Бог чыніць з уладара свайго пасярэдніка святасці і збаўлення

“Ажыцяўленне ўлады з’яўляецца абавязкам, які ўладар атрымлівае ад Бога; адказнасцю, якую неабходна выконваць у залежнасці і пакоры, пераўтвараючыся такім чынам у знак, магутнай і прадбачлівай прысутнасці Пана пасярод усяго народа. Панаванне над ворагамі, хвала і перамога з’яўляюцца атрыманымі дарамі, якія робяць з уладара пасярэдніка Боскага трыўмфу над злом; Бог пануе над ворагамі змяняючы іх, перамагаючы іх сваёй любоўю”.

Іншым аспектам, на які звярнуў увагу Бэнэдыкт XVI з’яўляецца святарскае вымярэнне зямнога ўладара, на што ўказваюць словы псальма: “Ты святар навекі на ўзор Мельхізэдэка”. “Уладар, аб якім кажа псальм будзе святаром навекі, пасярэднікам Боскай прысутнасці у народзе, праз благаслаўленне, якое паходзіць ад Бога і ў літургічных дзеяннях сустракаецца з благаслаўлёным адказам чалавека”, - сказаў Папа. Пантыфік нагадаў, што сапраўдным святаром з’яўляецца Езус, які ўпоўні ўдасканальвае рысы святарства Мельхізэдэка.

Акрамя таго, Святы Айцец адзначыў, што ў псальме Бог таксама прадстаўлены як абаронца ўладара. “Так пачынаюцца апошнія радкі псальма, у якіх апісваецца вобраз трыўмфуючага караля, падтрыманага Богам, і ад якога ён атрымлівае ўладу і хвалу. Уладар, абаронены Панам, знішчае ўсе перашкоды і ідзе насустрач перамозе”, - сказаў Бэнэдыкт XVI.

“Кажуць, што ў свеце ёсць шмат зла, існуе пастаянная барацьба паміж дабром і злом і здаецца, што зло мацнейшае. Не! Больш моцны Пан, наш сапраўдны валадар і святар. Хрыстус перамагае сілай Бога і негледзячы на ўсё тое, што выклікае сумневы аб пазітыўным заканчэнні гісторыі, пераможа мінавіта Ён, дабро, любоў, але не нянавісць”.

Святы Айцец адзначыў, што традыцыя Касцёла бачыць у гэтым псальме адзін з самых значных месіянскіх тэкстаў. “Уладар, аб якім кажа псальміст, гэта Хрыстус, Месія, які ўстановіць Божае Валадарства і пераможа сілы гэтага свету”, - сказаў Папа.

“Пасха Хрыста, становіцца, такім чынам, рэальнасцю на якую нас запрашае глядзець псальміст; глядзець на Хрыста, каб зразумець сапраўдны сэнс ўладарання і жыцця служачы і прыносячы самаго сябе ў дар, праз шлях пакоры і любові “да канца”.

Бэнэдыкт XVI заклікаў молячыся гэтым псальмам, прасіць у Бога весці нас па сваім шляху, дапамагаць наследаваць Хрыста, валадара і Месію, быць гатовымі ўзыйсці на вяршыню крыжа, каб разам з ім дасягнуць хвалы, сузіраць яго, уладара і пераможцу, а таксама міласэрнага святара, які дае прабачэнне і збаўленне усім людзям. Папа, адзначыў, што на працягу апошніх катэхез ён пазнаёміў вернікаў з некаторымі псальмамі, якія з’яўляюцца каштоўнымі творамі малітвы, што нам дае Біблія, і якія тычацца розных сітуацый нашага жыцця і стану душы. “Нашы адносіны з Богам не могуць не ўзбагачацца штодзённым радасным і поўным даверу шляхам да Яго”, - адзначыў Пантыфік.

Пасля катэхезы Бэнэдыкт XVI на розных мовах прывітаў пілігрымаў прысутных на плошчы св. Пятра. Звяртаючыся да моладзі, хворых і тых, хто нядаўна праняў сакрамэнт сужэнства, Папа заклікаў іх заўсёды заставацца вернымі Богу і браць прыклад са святых, якіх Касцёл успамінаў учора і сёння, а менавіта св. Альберта Вялікага, св. Маргарыты Шатландскай і св. Гертруды.