Imzot Tomazi në OKB-në e Gjenevës: bombat copëtuese, plagë e hapur, në dëm të së
drejtës humanitare.
Është e papranueshme të rrimë duar kryq e të shikojmë sesi bombat copëtuese mbysin
mijëra njerëz të pafajshëm, duke krijuar rrezikun e dobësimit të normave të së drejtës
humanitare, hartuar për mbrojtjen e civilëve. E theksoi këtë kryeipeshkvi Silvano
Maria Tomazi, vëzhgues i Selisë së Shenjtë në OKB-në e Gjenevës, duke folur dje në
Konferencën për rishikimin ose kufizimin e përdorimit të armëve të zakonshme, shumë
të dëmshme e me pasoja shkatrrimtare. Selia e Shenjtë është e zhgënjyer nga qëndrimi,
që vijon të mbahet, lidhur me temën e zhdukjes së këtyre bombave të tmerrshme, që
njihen me epitetin ‘copëtuese’, pikërisht për efektin e tyre mbi viktimat. Pavarësisht
nga hapat pozitive të organizmit të OKB-së, pohoi prelati, nuk është arritur akoma
marrëveshja për qëndrimin kundër armëve copëtuese, që çon edhe në forcimin e mbrojtjes
civile nga kjo kategori armësh. Në një situatë të pasigurtë ndërkombëtare e në një
botë të shqetë, e drejta ndërkombëtare mbetet e pashmangëshme për sigurinë e njerëzimit.
E duhet punuar, për të mënjanuar rrezikun, që kjo e drejtë të dobësohet. Është detyrë
e Konferencës së OKB-së t’i mbrojë popullsistë civile, përfundoi prelati, sepse mbi
aftësitë e saj bazohet respektimi i dispozitave të së drejtës humanitare ndërkombëtare
si dhe forcimi i mëtejshëm i tyre.