Беларусь у цэнтры міжнароднага экуменічнага дыялога
Сёння ў Мінску працягвалася
міжнародная канферэнцыя “Праваслаўна-каталіцкі дыялог: хрысціянскія этычныя каштоўнасці
як уклад у сацыяльнае жыццё Еўропы”. У гэтым высокім форуме прымаюць удзел тэолагі,
вучоныя, філосафы, духавенства з 10 краін свету. У тым ліку арцыбіскуп Тадэвуш Кандрусевіч
і Мітрапаліт Філарэт. Высокім госцем канфэренцыі стаў старшыня Папскай рады спрыяння
хрысціянскаму адзінству кардынал Курт Кох. Напярэданні ён меў магчымасць не толькі
пачуць, але і ўбачыць адносіны паміж двума галоўнымі канфесіямі Беларусі – кардынал
наведаў праваслаўную літургію і ўзначаліў св. Імшу ў архікатэдральным касцёле Імя
Найсвяцейшай Панны Марыі. Сёння ватыканскі іерарх сустрэўся з Канферэнцыяй Каталіцкіх
Біскупаў у Беларусі. Не шмат форумаў могуць выклікаць такі інтарэс – 200 удзельнікаў
з 10 стран – адзначыў ігумен Філарэт Ягораў, член Усеўкраінскага праваслаўнага педагагічнага
аб’яднання.
Другі дзень канферэнцыі прысвяцілі пошуку адказаў на выклікі
сучаснага свету – секулярызацыі, пытанням міграцыі, біяэтыкі, крызісу сям’і і веры.
Хрысціянскія каштоўнасці – нязменныя. Яны не павінны быць залежнымі ад сітуацыі, а,
наадварот, уплываць і змяняць яе – гэта словы з аднаго з дакладаў. Невыпадкова такі
прадстаўнічы форум сабраўся менавіта ў Беларусі. Традыцыйныя канфесіі маюць добрыя
адносіны паміж сабой. Як адзначыў айцец Фадзей Барнас, галоўны рэдактар часопіса “Ірынікон”
з Бельгіі (ён спецыялізуецца на экуменічнай тэматыцы) Беларусь – мост паміж каталіцкім
Захадам і праваслаўным Усходам. І такія форумы – гэта ўнікальная магчымасць пачуць
у гэтым свеце адно аднаго, а свету – пачуць голас Царквы.
“Нам вядома, што
на працягу гісторыі існавалі праблемы ў праваслаўна-каталіцкім дыялогу, але сёння
ў яго цэнтры знаходзіцца менавіта Беларусь. Тут існуе магчымасць праводзіць падобныя
канферэнцыі і трэба адзначыць, што ў гэтым ёсць заслуга Мітрапаліта Філарэта. Ён сваімі
намаганнямі вельмі спрыяе развіццю гэтага дыялога. Сёння Беларусь – lгэта тое месца
якое дазваляе паменшыць ціск у адносінах паміж двума канфесіямі”, - падкрэсліў госць
з Францыі.
Гэта сёмы форум з цыклу так званых дыялогаў. Па традыцыі, з-за стала
перамоў удзельнікі перамяшчаюцца ў зал канцэртны. У гэтыя хвіліны ў Белдзяржфілармоніі
праходзіць канцэрт “Галасы стварэння-2011” – падчас якога гучаць праваслаўныя і каталіцкія
песнапенні, у тым ліку “Рэквіем” Моцарта, адмыслова прысвечаны памёршаму кардыналу
Казіміру Свёнтку.