Papa përshëndet takimin “Oborri i jobesimtarëve” në Tiranë me kardinalin Ravasi në
dialog me botën e kulturës
“Oborri i jobesimtarëve”nismë e President të Këshillit Papnor për Kulturën
kardinali Gianfranco Ravasi, për të favorizuar takimin dhe dialogun ndërmjet besimtarëve
e jobesimtarëve, filloi sot veprimtarinë dy ditore në Tiranë me mesazhin dhe bekimin
e Papës Benediktit XVI. Kështu nga dita e sotme e deri më 16 nëntor ky takim zhvillohet
në kryeqytetin e Shqipërisë mbi temën: “Në çfarë beson ai që nuk beson?”. Synimi
është ai për të biseduar dhe përgjigjur në këtë pyetje e në pyetje tjera lidhur me
identitetin e veçantë fetar dhe përshpirtërinë e popullit shqiptar. Mbi këtë në Tiranë
takohen personalitete të botës kishtare me ato kulturore dhe politike që i përkasin
besimeve të ndryshme ose nuk i përkasin aspak asnjë feje. Nga ana Kishtare dialogun
e drejton kardinali Giancafranco Ravasi, President i Këshillit Papnor për Kulturën,
i cili me shumë përzemërsi, interes dhe vëmendje dëshiron të dëgjojë se çfarë kanë
për të thënë mbi përmasën shpirtërore të jetës së njeriut, ata njerëz të kulturës
që kanë kaluar nëpër përvojën e ateizmit shtetëror, siç ishte Shqipëria në kohën e
diktaturës komuniste. Pastaj edhe kardinali Ravasi, që shprehu kënaqësinë e tij për
këtë vizitë në Shqipëri, dëshiron të ofrojë pikërisht vështrimin që krishterimi dhe
Kisha kanë rreth kësaj çështje kaq të rëndësishme për njeriun dhe shoqërinë bashkëkohore. Kështu
sot më 14 nëntor, takimi i parë iu kushtua të rinjve në Oborrin e Katedrales
së shën Palit në Tiranë. Në çadrat e ngritura për këtë ngjarje, të rinjtë e ardhur
nga anë të ndryshme të Shqipërisë bënë pyetjet e tyre mbi: “Hyjin e panjohur” dhe
praninë e kërkimin e Tij. Takimi vijon me tryezat e dialogut kushtohen temave të punës,
përshpirtërisë dhe informacionit. Marrin pjesë besimtarë e jobesimtarë me dialogun
dhe shkëmbyer përvojën e tyre njëri me tjetrin. Më pas, mbrëmja ofron një festë
me shprehje artistike të komuniteteve të ndryshme fetare në Shqipëri, por edhe të
grupeve jobesimtarë. Të pranishëm edhe autoritetet më të larta fetare: katolikë, ortodoksë,
myslimanë, bektashi, ungjillorë, hebrenj; kryetari i bashkisë së Tiranës dhe personalitete
tjera. Po mbi ditën e parë të “Oborrit të takimit” me jobesimtarët nga Tirana
të dëgjojmë shërbimin e Klaudia Bumçit..... Nesër më
15 nëntor, takimi “Oborri i jobesimtarëve” do të kalojë në çarqet Universitare
të Tiranës mbi temën “besimtarë e jobesimtarë përballë sfidave të shoqërisë postmoderne”.
Kardinali Ravasi do të paraqesë “Oborrin e takimit me jobesimtarët” dhe do të marrë
pjesë në dialogun me personalitetet e ndryshme shqiptare në fushën e kulturës, politikës,
diplomacisë, ekonomisë, e të drejtësisë. Oborri i jobesimtarëve në Tiranë mbyllet
me vizitën e kard. Ravasi në Universitetin Katolik Zoja e Këshillit të Mirë, në mëngjesin
e datës 16 nëntor.