Atë Lombardi paraqet shtegtimin e Papës në Benin: inkurajim për mbarë Afrikën.
Salla e Shtypit e Selisë së Shenjtë ishte, sot paradite, teatër i takimit, gjatë të
cilit u paraqit shtegtimi i 22-të apostolik i Benediktit XVI, më 18 deri më 20 nëntorin
e ardhshëm. Duke u folur gazetarëve të pranishëm, drejtori i Sallës vatikanase të
Shtypit, atë Federiko Lombardi, u ndalua posaçërisht tek arsyet kryesore, që e shtynë
Papën të rikthehet në Afrikë, pas shtegtimit të tij në Kamerun e Angola, më 2009.
E arsyeja e parë është, sigurisht, nënshkrimi i Nxitjes Apostolike pas-Sinodale të
Asamblesë II të posaçme të Sinodit të Ipeshkvijve afrikanë.
Gjeografikisht
i vogël, por shpirtërisht i madh për Kishën, është vendi i largët, që pret Papën.
Nga Benini, me 7 milionë banorë, një shekull e gjysëm më parë nisi ungjillëzimi, i
cili pak nga pak u shtri në të gjithë zonën përreth, nga Togo, në Ganë e Niger. E
popullsia vendase katolike përgatitet ta kremtojë me Benediktin XVI, 150- vjetorin
e arritjes së misionarëve të parë, që nisën veprimtarinë e kumtimit e të inkulturimit
të Ungjillit në vend. Atë Lombardi e paraqiti këtë kremtim si një nga arsyet e shtegtimit
të ardhshëm apostolik, që do të zhvillohet – u tha gazetarëve- në një atmosferë inkurajimi
të fuqishëm nga ana e Kishës, për mbarë Afrikën: “Është inkurajim
për Kontinentin Afrikan në të gjithë shtrirjen e tij. Prej këndej, një theksim i vetëdijshëm
mbi problemet, që e shqetësojë, parë në perspektivë pozitive: inkurajim për t’u impenjuar
në shërbim të pajtimit, të drejtësisë, të paqes, të zhvillimit të gjithanshëm njerëzor
e të kumtimit të Ungjillit, në shërbim të këtij zhvillimi”. Duke ndjekur
në hartë etapat e shtegtimit të afërt, atë Lombardi vuri menjëherë në dukje Nxitjen
apostolike pas sinodale “Africæ munus”, dokument që Benedikti XVI do ta nënshkruajë
e pastaj edhe do t’ua dorëzojë, të dielën e ardhshme, 35 krerëve të konferencave ipeshkvnore
kombëtare dhe 7 përfaqësuesve të konferencave zonale të Kontinentit. Por është edhe
një ngjarje tjetër, që e nxiti Papën të shkelë në trojet e Beninit: vizita tek varri
i kardinalit Bernardin Gantin, që vdiq në vitin 2008, por që mbeti i pranishëm, plot
nderim e dashuri, në zemrën e beninasve e, prej këndej, edhe në zemrën e Benediktit
XVI: “Njeri shumë i afërt i Papës së sotëm, për një mori arsyesh, sidomos
për arsye se ishte, për një kohë të gjatë, prefekt i Kongregatës për Ipeshkvijtë,
ndërsa Papa aktual, prefekt i Kongregatës për Doktrinën e Fesë. Kardinali Gantin pati
qenë edhe pararendës i drejtpërdrejtë i Atit të Shenjtë, si dekan i Kolegjit Kardinalor.
Duhet të kujtojmë se në Benin konsiderohet si Atë i Kombit, hero kombëtar, njeri që
gëzon nderimin e dashurinë e pjesës më të madhe të popullsisë. Prandaj figura e Gantinit
dhe vizita e Papës tek varri i tij, do të jenë aspekte domethënëse të këtij shtegtimi”. Në
vijim, duke kujtuar se Kisha beninase ka shkruar faqe të paharrueshme të historisë
së shtetit të vogël afrikan, nuk mund të mos dalë në pah edhe figura e një personaliteti
tjetër kishtar vendas, imzotit Izidor de Souza që, në krye të Konferencës kombëtare
beninase – kujtoi atë Lombardi – e ndihmoi vendin të rifitojë lirinë, duke hequr
dorë nga regjimi socialist e duke hedhur, kështu, bazat e demokracisë: “Pas
Konferencës kombëtare të Beninit, u organizuan shumë të tjera në Afrikë. Po kjo e
Beninit mbeti si model, që dha, pastaj, rezultate të shumta e të qëndrueshme. Kështu,
është fakt domethënës e arsye për të theksuar lavdinë e merituar të Kishës, që dha
një kontribut vendimtar në zhvillimin e kësaj konference. Imzot Souza, së bashku me
kardinalin Gantin, është një nga figurat e mëdha të vendit. U varros në katedrale
e edhe varri i tij do të vizitohet gjatë shtegtimit”.Ndërmjet shumë takimeve
zyrtare, atë Lombardi kujtoi edhe një ngjarje artistiko-kulturore, që do të gjallërojë
mbrëmjen e arritjes së Papës në Kotonu, të premten e ardhshme. Rreth orës 21.00, tre
nga artistët më të famshëm afrikanë, Papa Wemba, Bonga e Fifito, apo Filomeno Lopez,
kolegu ynë i Radio Vatikanit, do të japin një koncert me temën e paqes, të drejtësisë
e të pajtimit.