Кс. Ламбардзі: Папа плануе наведаць Мексіку і Кубу
Адказваючы сёння на
пытанні журналістаў аб магчымасці Апостальскага падарожжа Папы ў Лацінскую Амерыку,
кіраўнік Залі Друку Апостальскай Сталіцы кс. Фэдэрыко Ламбардзі падцвердзіў, што нунцыям
ў Мексіцы і на Кубе было даручана паведаміць рэлігійным і грамадзянскім кіраўнікам
гэтых краін, што Папа думае над праектам падарожжа, жадаючы станоўча адказаць на атрыманыя
запрашэнні.
“Бэнэдыкт XVI ўжо пабываў у Бразіліі, але таксама і іспанамоўныя
краіны кантынента жадаюць прывітаць намесніка св. Пятра на сваіх землях, а найбольшай
па народанасельніцтву з іх з’яўляецца Мексіка”, - расказаў кс. Ламбардзі. Святар адзначыў,
што Куба ў 2012 г. рыхтуецца адсвяткаваць 400-годдзе цудатворнай статуі Найсвяцейшай
Панны Марыі з Эль Кабрэ, якая захоўваецца ў санктуарыі недалёка ад Санцьяга, і візіт
можа быць прымеркаваны да гэтай нагоды.
Кс. Ламбардзі нагадаў, што пасля ўдзелу
Бэнэдыкта XVI ў кантынентальнай Канферэнцыі ў Апарэчыда 4 гады таму, у краінах Лацінскай
Амерыкі павысіўся місійны і евангелізацыйны запал. “Сваім падарожжам Папа жадае ўмацаваць
увесь Касцёл, асабліва ў сувязі з падрыхтоўкай да святкавання Года веры”,- падкрэсліў
кіраўнік Залі Друку Апостальскай Сталіцы.