Papa krerëve fetarë të Izraelit: jemi të thirrur të punojmë me guxim për dialogun
dhe paqen në Tokën e Shenjtë
Krerët fetarë të impenjohen me guxim për nxitjen e paqes në Tokën e Shenjtë: kjo qe
thirrja e Benediktit XVI sot paradite, gjatë audiencës me delegacionin e Këshillit
të krerëve fetarë të Izraelit, në Vatikan. Takimi qe rasti për të ritheksuar përgjegjësinë
e njerëzve të fesë në arritjen e paqes së drejtë e të qëndrueshme për Lindjen e Mesme
e për të gjithë botën. Në kohët tona të trazuara, nënvizoi Papa, dialogu ndërmjet
feve të ndryshme po bëhet gjithnjë e më i rëndësishëm për krijimin e një atmosfere
mirëkuptimi e respekti: “Kjo është veçanërisht e rëndësishme për krerët fetarë
të Tokës së Shenjtë, të cilët, ndërsa jetojnë në një vend të pasur me kujtime të shenjta
për traditat tona, vihen çdo ditë në provë nga vështirësitë për të jetuar së bashku
në harmoni”. Papa përsëriti fjalët e thëna në Takimin e fundit të Asizit ndërmjet
feve, duke nxjerrë në pah dy lloje të dhunës: nga njëra anë, përdorimi i dhunës në
emër të fesë e, nga ana tjetër, dhuna, si pasojë e mohimit të Zotit, që shpesh karakterizon
shoqërinë moderne: “Në këtë situatë, si krerë fetarë, jemi të thirrur të ripohojmë
se marrëdhëniet e njeriut me Zotin, të jetuara drejt, janë forcë për paqen. Kjo është
një e vërtetë, që duhet të bëhet gjithnjë e më e dukshme nga mënyra se si jetojmë
me njëri-tjetrin”. Ati i Shenjtë i inkurajoi të pranishmit të favorizojnë një
atmosferë besimi e dialogu në Tokën e Shenjtë: “Bashkëndajmë përgjegjësinë e
madhe të edukimit të anëtarëve të bashkësive tona fetare, me qëllim thellimin e njohjes
së ndërsjelltë e bashkëpunimin me njerëz të traditave të ndryshme fetare”. Fatkeqësisht,
vuri në dukje Papa, realiteti i botës dhe i Tokës së Shenjtë, në veçanti, është tepër
i copëzuar. Ja pse, secili duhet të impenjohet edhe në promovimin e drejtësisë e të
dinjitetit të njeriut, në mënyrë që bota të ketë një përmasë plotësisht njerëzore: “Drejtësia,
së bashku me të vërtetën, me dashurinë e me lirinë, është kërkesa themelore për një
paqe të sigurtë e të qëndrueshme në botë. Pajtimi kërkon guxim e horizont, si edhe
besimin se do të jetë vetë Zoti, Ai që do të na e tregojë rrugën. Nuk mund t’i arrijmë
objektivat nëse Hyji nuk na jep forcë”. Në fund, Benedikti XVI kujtoi lutjen
për paqen, që vendosi në Murin perëndimor të Tempullit të Jeruzalemit, me rastin e
shtegtimit të tij apostolik, në maj 2009. Papa i kërkoi Zotit t’i dëgjojë lutjet e
të gjithë atyre, që duan paqen në Jeruzalem: “Të mos rreshtim kurrë së luturi
për paqen në Tokën e Shenjtë, të patundur në besimin se Zoti vetë është paqja dhe
ngushëllimi ynë”.