Kardinali Koch kujton Mitropolitin ortodoks Damaskinos: promotor i mirëkuptimit ndërmjet
katolikëve e ortodoksëve
Një mik i sinqertë dhe i përzemërt: kështu, me pak fjalë, kardinali Kurt Koch, president
i Këshillit Papnor për Bashkimin e të Krishterëve, e kujton peshkopin Damaskinos,
i cili nga viti 1982 deri më 2003 qe Mitropolit i parë ortodoks i patrikanës ekumenike
në Zvicër, që ndërroi jetë më 5 nëntorin e kaluar. Në letrën e ngushëllimit dërguar
Patrikut ekumenik të Kostandinopojës Bartolomeut I, kardinali Koch nënvizon posaçërisht
angazhimin e pareshtur të Damaskinos për dialogun ndërmjet katolikëve e ortodoksëve,
“dashurinë që kishte për Kishën dhe interesimin e pasionuar që tregoi për kërkimin
e bashkimit të të krishterëve”. Njeri i urtë e me “formim të shkëlqyeshëm”, shkruan
kardinali Koch, Mitropoliti i ndjerë u angazhua në mënyrë aktive “në favor të mirëkuptimit
e të bashkëpunimit të anasjelltë ndërmjet ortodoksëve e katolikëve”. Marrëdhënien
e tij me dikasterin e Vatikanit për Bashkimin e të krishterëve qenë përherë “intensive
e shumë të përzemërta”. Edhe Papa Benedikti e pat vlerësuar veprimtarinë e Damaskinos
më 1 shkurt 2007 gjatë audiencës së Fondacionit për Kërkim e Dialog ndërfetar, që
aso kohe drejtohej pikërisht nga Damaskinos. Kujtojmë se ceremonia e varrimit të Mitropolitit
do të kremtohet nesër në Chambésy, në Zvicër.