Святы Айцец да новага пасла Германіі: матэрыялістычныя і геданістычныя тэндэнцыі ў
краінах заходняга свету
7 лістапада папа Бэнэдыкт
XVI прыняў даверчыя граматы новага пасла Германіі пры Апостальскай Сталіцы Райнхарда
Швэппэ. У звароце да нямецкага дыпламата Пантыфік узгадаў свой нядаўні візіт у ФРГ
і падзякаваў яшчэ раз усім, хто падрыхтаваў яго.
Святы Айцец нагадаў, што
Касцёл хоць і дзейнічае ў культурным вымярэнні, зрабіўшы і робячы ўсцяж свой уклад
у сусветную спадчыну, рухавіком усяго гэтага аднак з’яўляецца каталіцкая традыцыя
і вера, што робіць усе культурныя здабыткі нечым універсальным і зразумелым для ўсіх.
Папа
падкрэсліў пазітыўны ўклад у развіццё нямецкага грамадства Канстытуцыі 1949 году.
Пасля другой сусветнай вайны і гадоў дыктатуры, якая ігнаравала антрапалагічную ісціну,
людзі пажадалі замацаваць апошнюю праз закон. “Сёння, аднак, - звярнуў увагу Святы
Айцец, - асноўныя каштоўнасці чалавецтва зноў паддаюцца дыскусіі, якая адбываецца
вакол пытання аб годнасці чалавека як чалавека. Касцёл глядзіць на гэта праз прызму
сваёй веры, і бачыць абавязак весці ўсё наша грамадства да ісціны і каштоўнасцяў,
бо тут гаворка ідзе менавіта пра годнасць чалавека”. Паводле Папы, “грамадства толькі
тады з'яўляецца па-сапраўднаму чалавечым, калі паважае годнасць кожнага чалавека ад
зачацця да натуральнай смерці, і цалкам бароніць яго”. Калі Апостальская Сталіца звяртае
ўвагу на асноўныя пытанні чалавечай годнасці, як робіць гэта сёння ў многіх галінах
прэнатальнага існавання чалавека, яна не робіць гэтага кіруючыся выключна верай, але
баронячы каштоўнасці і ісціны чалавечага існавання як прынцыпова прымальныя для ўсіх. Святы
Айцец звярнуў увагу новага пасла Германіі пры Апостальскай Сталіцы на яшчэ адзін аспект
існавання сённяшняга Еўрапейскага грамадства – матэрыялістычныя і геданістычныя тэндэнцыі,
асабліва ў краінах так званага заходняга свету, у прыватнасці на сексуальную дыскрымінацыю
жанчын. “Кожны чалавек, мужчына ці жанчына, пакліканы дапамагаць адзін аднаму. - звярнуў
увагу Пантыфік - Адносіны, якія ігнаруюць тое, што мужчына і жанчына маюць роўную
годнасць, з’яўляюцца сур'ёзным злачынствам супраць чалавечнасці”. Па словах Папы,
Святы Пасад будзе клапаціцца, каб неабходныя меры супраць гэтых злоўжыванняў з боку
Каталіцкага Касцёла ў Германіі былі прыняты рашуча і ясна.
Бэнэдыкт XVI адзначыў
шмат добрых вынікаў супрацоўніцтва Апостальскай Сталіцы і Федэратыўнай Рэспублікі
Германія і пажадаў новаму паслу добрага пачатку місіі і поспехаў у вырашэнні пастаўленых
задач.
Райнхард Швэппэ нарадзіўся 12 красавіка 1949 г. Вывучаў юрыспрудэнцыю
ў Фрайбургскім і Гамбургскім універсітэтах і спецыялізаваўся на палітэканоміцы. З
1977 г. працаваў у розных дыпламатычных прадстаўніцтвах ФРГ, у тым ліку з 1980 г.
па 1983 г. быў прадстаўніком Германіі ў структурах Еўрасаюза. З 2003 г. па 2007 г.
з’яўляюся паслом Германіі ў Польшчы. Жанаты, мае трох дзяцей. Валодае, апроч нямецкай,
ангельскай, французскай, польскай, галандскай і італьянскай мовамі.