Udhëtimi Benediktit XVI në Benin më 18 nëntor është i dyti shtegtim papnor në Afrikë
“Shtegtimi i Papës në Benin në Afrikë nga 18 deri më 20 nëntor 2011është një ngjarje
e madhe, që po i mobilizon të gjithë qytetarët, pavarësisht nga feja së cilës i përkasin”.
E mësojmë këtë nga misionarët kombonianë të famullisë së Shën Françeskut të Asizit,
në Cotonou, kryeqytet i vendit afrikan. Kudo tashmë ndjehet fort atmosfera e gëzimit
dhe e gatishmërisë për një pjesëmarrje sa më masive gjatë gjithë vizitës, që pritet
me padurim e shikohet si bekim, pohojnë në agjencinë Misna rregulltarët. Benedikti
XVI do të jetë në Benin nga 18 deri më 20 nëntor, për të dorëzuar Nxitjen Apostolike
të Sinodit II të Afrikës, me temë “Kisha afrikane në shërbim të pajtimit e të paqes”,
mbajtur në Vatikan në tetor 2009. Do të jetë shtegtimi II i Papës në Afrikë, pas
atij të marsit 2010, në Kamerun e Angolë. Vizita përkon me 150-vjetorin e pranisë
katolike në vend e në Afrikën perëndimore, si dhe me 40-vjetorin e lidhjes së marrëdhënieve
diplomatike ndërmjet qeverisë benineze dhe Selisë Apostolike. Misionarët kombonianë,
të impenjuar në veprimtarinë e sensibilizimit e të informacionit për vizitën e Papës,
kryejnë misionin në një vend me shumicë myslimane, ku sundojnë besimet tradicionale. 24%
e popullsisë është katolike. Kisha është e pranishme me dhjetë dioqeza e 312 famulli. “Duke
zgjedhur vendin tonë për këtë shtegtim, Papa i bën nder Kishës në Benin dhe pohon
se përfaqëson një pikë referimi për mbarë zonën, duke e shikuar si Kishë me prirje
të fuqishme misionare përtej vendit”, shpjegojnë misionarët kombonianë, dhe saktësojnë
se ndërmjet bashkësive të ndryshme fetare në vend, ndjehet fort atmosfera e bashkëjetesës
dhe e bashkëpunimit të shkëlqyer.