Greqia e Italia, problematike në Evropë: cili do të jetë fati i euros?
Greqia e Italia vazhdojnë ta shqetësojnë botën, për brishtësinë me të cilën po përballojnë
krizën ekonomike. Kryeministri grek Papandreu dha dorëheqjen mbrëmë, për t’i dhënë
mundësinë një qeverie të bashkimit kombëtar, me në krye ish-zv.drejtorin e Bankës
Qendrore Evropiane, Lukas Papademos t’u garantojë tregjeve ndërkombëtare vazhdimin
e politikës së sakrificave, kërkuar nga Bashkimi Evropian dhe Fondi Monetar Ndërkombëtar
për daljen nga kriza. Më 19 shkurt, në Greqi do të zhvillohen zgjedhjet e reja. Ndërkaq,
në Itali, pavarësisht nga zërat, që flasin për dorëheqjen e kryeministrit aktual,
Silvio Berluskoni, ky i fundit deklaron se do të vazhdojë të qëndrojë në karrigen
e tij, derisa të ketë akoma shumicën e votave në parlament. Ndër deputetët italianë
ka filluar një shitblerje e turpshme votash e më shumë se ekonomia, tregjet ndërkombëtare
i shqetëson pikërisht brishtësia e sistemit politik. Të dëgjojmë editorialisten e
gazetës ekonomike italiane “Sole 24 Ore”, Adriana Çerreteli, me telefon nga Brukseli: Kam
frikë se si në Greqi, ashtu edhe në Itali, lufta e pushtetit ndërmjet partive qeverisëse
dhe atyre të opozitës është e tillë, sa të kompromentojë të gjitha përpjekjet, që
do t’i dëshironin madje, edhe një pjesë e forcave politike. Në përgjithësi në Evropë,
shoh një gjendje shumë shqetësuese, pasi nuk ka asnjë klasë politike në pushtet, duke
përfshirë këtu edhe Gjermaninë, që të jetë në gjendje të përcaktojë e të zbatojë një
politikë të sinqertë e të fuqishme kundër krizës. Figura e Lukas Papademos,
ish-drejtues i Bankës Qendrore Evropiane, si shihet në Bruksel? Janë të gjithë
njerëz të besueshëm, por kanë të bëjnë me realitete politike shumë larg nga përsosuria,
të cilat, nga ana e tyre, kushtëzohen nga situata objektivisht të vështira: industri,
sindikata, punonjës publikë, pensionistë, njerëz, që humbin një pjesë të rrogës. Sakrificat
janë të jashtëzakonshme e duhen bërë në kohë shumë të shkurtër, me gjithë problemet
që sjell kjo. Në Greqi, për shembull, numri i vetëvrasjeve është rritur me 40%. Të
qeverisësh në këto kushte, nuk është e lehtë. Po Italia? Deri pak muaj
më parë, Italia konsiderohej e sigurtë, por vetëm për një muaj e gjysëm stuhia ka
përfshirë edhe Italinë, si tregun, ashtu edhe politikën. Vendi është në rrezik, megjithëse
jam dakord me atë, që tha para disa ditësh, guvernatori i Bankës së Italisë, Injacio
Visko: “Gjendja e borxhit italian mund të përballohet derisa interesat të arrijnë
në 8%”. Por kjo nuk mund të vazhdojë gjatë. Të mos harrojmë se sulmet kundër Italisë
në bursë janë një lloj mbrojtjeje për Francën, e cila, gjithashtu ka probleme. Nëse
vazhdojmë kështu, euro është në rrezik.