G20-a: Rezoluta përfundimtare përcakton një plan me gjashtë hapa për zhvillimin
Të enjten e të pemten u mbajt në Cannes të Francës, mbledhja e G20-ës për kapërcimin
e krizës ekonomike botërore. Takimet e ethshme me vendet në rrezik falimentimi sollën
disa rezultate. Greqia hoqi dorë nga referendumi për paketën e masave, të domosdoshme
për kapërcimin e krizës, ndërsa Italia paraqiti një plan, zbatimi i të cilit do të
kontrollohet nga Fondi Monetar Ndërkombëtar. Në rezolutën përfundimtare, 20 të mëdhenjtë
e globit përcaktojnë gjashtë hapa të rëndësishme për zhvillimin afatmesëm dhe detaje
për programet e kapërcimit të krizës në secilin prej vendeve. SHBA-të, për shembull,
impenjohen që deri në mes të kësaj dekade, borxhi i tyre publik të jetë më i vogël
se Prodhimi i Brendshëm. Gjermania dhe ekonomitë me zhvillim të shpejtë, si India
e Kina, premtojnë të përmirësojnë raportin kërkesë-ofertë brenda vendit. Gjithashtu,
bëhet thirrje për një Këshill, apo Komitet të Stabilitetit Financiar, i cili duhet
të studiojë dhe të vendosë rregulla të qarta botërore në fushën e ekonomisë. Përmendet
gjithashtu, e ashtuquajtura “tobin tax”, taksa mbi transaksionet financiare, për të
cilën nuk janë dakord të gjitha vendet. G20-ës iu drejtua edhe Papa gjatë audiencës
së përgjithshme të së mërkurës, me thirrjen për të vendosur me përgjegjësi mbi fatet
ekonomike të botës, duke synuar zhvillimin e vërtetë njerëzor. Edhe ipeshkvijtë e
Anglisë e të Uellsit, në një dokument, i ftuan liderët e globit të marrin masa për
të luftuar varfërinë, pa i reduktuar fondet për këtë qëllim.