Бэнэдыкт XVІ скіраваў пасланне Канферэнцыі Біскупаў Францыі

5 лістапада ад Папы атрымалі пасланне французскія біскупы, сабраныя ў Лурдзе на сваёй восеньскай пленарнай асамблеі. Яно падпісана Дзяржаўным сакратаром Яго Святасці кардыналам Тарчызіо Бэртонэ. Іерарх паведамляе, што ў так складаны для жыцця Касцёла ў Францыі момант Святы Айцец дасылае свае сардэчныя прывітанні і спалучаецца ў малітве з удзельнікамі пасяджэнняў, якія даверылі іх заступніцтву Маці Божай з Лурд. Далей карданал Дзяржсакратар усхвальвае французскі епіскапат у выбары найважнейшага накірунку працаў – спрыяць абнаўленню духоўнага жыцця ў дыяцэзіях.

“У сэрцы гэтага абнаўлення знаходзіцца кансакраванае жыццё ў яго разнастайных формах, жыццяздольнасць якога залежыць ад правільных выбараў. Паколькі хрысціянскае сведчанне даецца праз кансакраваных асоб,-працягваецца далей,- яно стаецца ўсё больш значным для грамадства, моцна памечанага секулярызацыяй і рэлігійнай абыякавасцю, але і вялікай прагай духоўнасці.

Вашы разважанні наконт нядзельных сустрэч дазваляюць вернікам нанава адкрываць радасць пастаяннага ўдзелу ў Эўхарыстыі, які стаецца моцнай патрэбай ў дынаміцы хрысціянскага жыцця. Няхай жа падрыхтоўка да будучага Года Веры, які аб’явіў Святы Айцец, станецца для вас нагодай знаходзіць адэкватныя сродкі цэлебраваць Літургію у вашых дыяцэзіях у годны і плённы спосаб, дазваляючы тым, хто верыць у Езуса Хрыста, узмацняць сувязь з Эвангеллем і натхнёна несці хрысціянскае сведчанне,”- заклікае кардынал Тарчызіо Бэртонэ. Іерарх запэўнывае біскупаў Францыі і ўсіх сабраных ля Масабьельскага грота, што Святы Айцец накіроўвае ім сваё Апостальскае Благаслаўленне.