Бэнэдыкт XVI звярнуўся да студэнтаў і выкладчыкаў Папскіх універсітэтаў
4 лістапада Бэнэдыкт
XVI прыняў удзел у малітве нешпараў з нагоды пачатку навучальнага года ў Папскіх універсітэтах
Рыма. У малітве, якая прайшла ў Ватыканскай базыліцы прынялі ўдзел шматлікія студэнты,
выкладчыкі, а таксама іерархі Касцёла.
Папа звярнуўся да прысутных з прамовай,
якую прысвяціў святарскаму служэнню. Святы Айцец адзначыў, што пакліканне да апостальскай
дзейнасці нараджаецца дзякуючы малітве, блізкаму асабістаму кантакту з Хрыстом і жаданню
перадаваць веру і атрыманае пасланне. “Перш за ўсё ў пакліканні да святарскага служэння,
прысутнічае сустрэча з Езусам і вялікае ўражанне ад Яго словаў, жэстаў, голаса”, -
сказаў Папа. “Той хто служыць Евангеллю – гэта чалавек, які, умацоўваецца Хрыстом,
здольны быць з Ім, увайсці ў сугучча з Ім, блізкае сяброўства, каб рабіць “тое, што
падабаецца Айцу”, згодна з Яго жаданнем любові, з вялікай унутранай свабодай і глыбокай
радасцю сэрца”, - падкрэсліў Святы Айцец.
Папа нагадаў, што пакліканне гэта
не заслуга чалавека, але дар Бога, а таксама аб тым, што сапраўдным дасягненнем святара
з’яўляецца не поспех, але крыж.
Пантыфік звярнуўся таксама да шматлікіх прысутных
свецкіх вернікаў і заклікаў іх таксама штодзённа шукаць глыбокіх адносін з Хрыстом
і выконваць Яго волю. “Важна падрыхтавацца, праз сур’ёзныя адносіны да вучобы, да
таго, каб служыць Божаму Народу ў заданнях, якія вам давераны”, - сказаў Бэнэдыкт
XVI.