Адбудзецца рэарганізацыя Канферэнцыі Біскупаў Партугаліі
7 -10 лістапада ў
Фаціме пройдзе пленарная асаблея Канферэнцыі біскупаў Партугаліі. Сёння інфармацыйнае
агенства “Ecclesia” паведамляе, што ў праграме сустрэчы стаяць праблемы эканамічнага
крызісу, моладзі, падрыхтовак да Сінода Біскупаў аб новай евангелізацыі, які пройдзе
ў Рыме ў кастрычніку 2012 г.
178-ю пленарную асамблею партугальскіх біскупаў
адкрые патрыярх Лісабона кардынал Жазэ Да Крус Палікарпа. Як гаворыцца ў паведамленні,
Партугалія знаходзіцца сярод краін еўразоны, якія найбольш рызыкуюць у абліччы эканамічнага
крызісу, разам з Грэцыяй, Ірландыяй, Іспаніяй і Італіяй.
Напярэдадні партугальскія
біскупы звярнуліся да моладзі краіны з заклікам аб адказнасці.Яны выдалі спецыяльнае
пастырскае пасланне пад дэвізам:“Крызіс, разважлівасць і ўдзел”. У ім біскупы прапануюць
свой аналіз магчымых шляхоў выхаду з цяперашняга становішча.
На сваёй чарговай
восеньскай сустрэчы гэтым разам партугальскія біскупы абмяркуюць прапанову аб скарачэнні
колькасці біскупскіх Камісій з дзевяці да сямі, што павінна паспрыяць рацыяналізацыі
душпастырскай працы. Ідэя была вылучана ў кастрычніку Пастаяннай радай Біскупскай
канферэнцыі. Біскупы паразважаюць аб іх місіі і намецяць шляхі дзейнасці ў актуальных
умовах. Асамблея выбярэ дэлегатаў Сінода Біскупаў аб новай евангелізацыі 2012 г.