Папа прыняў даверчыя граматы пасла Кот-д’Івуара пры Апостальскай Сталіцы
4 лістапада Бэнэдыкт
XVI прыняў даверчыя граматы новага пасла Рэспублікі Кот-д’Івуар пры Апостальскай Сталіцы
спадара Жозэ Цеба-Кла. Папа звярнуўся да яго з прамовай у якой запэўніў у сваёй малітве
аб тым, каб жыхары Кот-д’Івуара маглі жыць годна, шчасліва і спакойна.
Пантыфік
адзначыў, што вельмі цэніць імкненне ўрада гэтай краіны шукаць шляхі для дасягнення
нацыянальнага прымірэння і грамадскага адзінства на фундаменце праўды, гармоніі і
павагі да чалавечай годнасці. “133 псальм кажа: як добра калі браты жывуць разам і
ў адзінстве”, - нагадаў Святы Айцец і выказаў надзею, што прымірэнне паміж жыхарамі
Кот-д’Івуара зможа стаць прыкладам для ўсіх краін афрыканскага кантынента.
Бэнэдыкт
XVI падкрэсліў, што падчас грамадзянскай вайны ў гэтай краіне яе насельніцтва стала
сведкам жудасных злачынстваў і парушэння правоў чалавека. Папа заклікаў не баяцца
праўды аб мінулым, але імкнуцца гарманічна і праўдзіва пераасэнсаваць яе і спрыяць
рэалізацыі справядлівасці.
Святы Айцец звярнуў увагу на важнасці празрыстасці
падчас судовых працэсаў над злачынцамі і ў кіраванні дзяржавай. “Дасягненне агульнага
дабра патрабуе дысцыпліны, справядлівасці і празрыстасці ў сферы дзяржаўнага кіравання”,
- падкрэсліў Папа.
Пантыфік адзначыў, што рэлігійная разнароднасць насельніцтва
Кот-д’Івуара з’яўляецца сапраўдным багаццем. “Дзяржава не можа падтрымліваць толькі
адну з рэлігій, але павінна гарантаваць свабоду і мір паміж паслядоўнікамі ўсіх веравызнанняў”,
- падкрэсліў Святы Айцец.
Бэнэдыкт XVI запэўніў новага дыпламатычнага прадстаўніка
Кот-д’Івуара ў тым, што Касцёл працягне падтрымліваць і дапамагаць гэтай краіне ў
сферах развіцця, адукацыі, аховы здароўя і дабрачыннай дзейнасці.
Новапрызначыны
пасол Кот-д’Івуара пры Апостальскай Сталіцы спадар Жозэ Цеба-Кла атрымаў адукацыю
ў сферы міжнародных адносін у Парыжы. Пачаў дыпламатычную кар’еру ў 1976 г. Працаваў
сакратаром пасольстваў Кот-д’Івуара ў Буркіна Фасо і Бельгіі. З 2003 г. быў саветнікам
у пасольстве гэтай краіны пры Апостальскай Сталіцы.