Papa ambasadorit të Bregut të Fildishtë: të promovohet paqja përmes së vërtetës dhe
drejtësisë
“Pajtimi i shpirtërave të acaruara dhe transparenca në drejtimin e brendshëm të vendit”:
sipas Papës, këto janë detyrat kryesore, që duhet t’i kenë parasysh mbarështuesit
e pasurive publike në Bregun e Fildishtë. Benedikti XVI i theksoi gjatë audiencës
me ambasadorin e ri të vendit afrikan pranë Selisë së Shenjtë, Jozef Tebah-Klah. Ambasadori
i ri u prit sot paradite në Vatikan, për paraqitjen e Letrave kredenciale, në sa përkujtohet
40-vjetori i fillimit të marrëdhënieve diplomatike ndërmjet Selisë së Shenjtë e Bregut
të Fildishtë.
“E kam ndjekur me shqetësim të thellë dramën e krizës pas-elektorale,
që jetoi vendi juaj, një krizë, e cila minoi bashkëjetesën shoqërore dhe solli përçarje
të reja, ende shqetësuese”. E nisi me këto fjalë, Benedikti XVI, analizën e situatës
në Bregun e Fildishtë, duke theksuar faktorin kryesor të mungesës së ekuilibrit në
vendin afrikan, atdhe i më se 60 etnive, që janë ende në kërkim të bazës për bashkëjetesën
e që, në përpjekjen për ta gjetur, mund të bëhen model për mbarë Afrikën: “La
grave crise que la Côte d’Ivoire… Kriza e rëndë, që jetoi Bregu i Fildishtë,
pati si pasojë shkelje edhe më të rënda të të drejtave të njeriut, si dhe shumë viktima.
Prandaj e inkurajoj vendin tuaj të vërë në jetë të gjitha nismat e mundshme për paqen
e drejtësinë. Mos kini frikë ta kërkoni dhe ta gjeni të vërtetën mbi krimet e mbi
dhunën e kryer kundër të drejtave të njeriut. Jetesa e përbashkët do të bëhet e mundur,
vetëm përmes kërkimit të së vërtetës dhe të drejtësisë”. Lidhur me këtë, Benedikti
XVI theksoi se e vlerëson krijimin e Komisionit për të vërtetën, drejtësisë e pajtimin
dhe uroi që ky komision të kryejë një punë sa më të kujdesshme e, sidomos, të paanshme.
Nevojën për shqyrtimin e kujdesshëm e të vëmendshëm të së kaluarës, në funksion të
ardhmërisë më të qëndrueshme, Papa e theksoi edhe kur reflektoi për një problem tjetër
të mprehtë: domosdoshmërinë e luftës kundër korrupsionit, plagë e rrezikshme në shoqërinë
e Bregut të Fildishtë: “Je voudrais encourager les responsables… Dëshiroj
t’i inkurajoj drejtuesit e vendit tuaj të impenjohen vendosmërisht në rrugën drejt
qeverisjes transperente e të drejtë e ta mbështesin ligjin për sjelljen e mirë të
anëtarëve të qeverisë, miratuar në gjysmën e gushtit të kaluar. Impenjimi për të mirën
e përbashkët kërkon që vendi të qeveriset me disiplinë, drejtësi, transperencë. Politikanët
duhet të bëjnë të gjitha përpjekjet e mundshme që qytetarët t’i gëzojnë njëlloj pasuritë
e vendit”. Më pas Benedikti XVI kërkoi të respektohen të drejtat e paprekshme
të tjetrit, shenjtëria jetës njerëzore dhe liria fetare. Ripohoi, pastaj, impenjimin
e Kishës në vend për të bashkëpunuar me institucionet e shtetit në rindërtimin e Bregut
të Fildishtë. Kisha, vërejti Papa, nuk dëshiron ta zëvendësojë shtetin, por përmes
institucioneve të saj të shumta edukative e shëndetësore, mund t’i japë ndihmesë të
madhe një vendi, përplot me plagë, në trup e në shpirt. E, që vendi të jetojë, plagët
duhen shëruar. Pastaj duhet pasur mirë parasysh se një komb pa institucione të fuqishme
edukative, që mësojnë e promovojnë vlerat morale, intelektuale e shpirtërore, nuk
mund të ketë të ardhme të sigurtë. Kam besim, përfundoi Ati i Shenjtë, se ky projekt
edukativ do të shikohet si detyrë parësore në punën për të ndërtuar Bregun e Fildishtë
të së nesërmes: të begatë, të zhvilluar, të drejtë, paqësor.