Да падарожжа Бэнэдыкта XVI у Бенін, якое адбудзецца 18-20 лістапада 2011 г., Ватыканскае
радыё выпусціла адмысловы кампакт-дыск пад назвай “Афрыка, стварай мір!” Святы Айцец
прыбудзе на Чорны кантынент, каб урачыста перадаць Апостальскую паслясінадальную адгартацыю
– плён працаў ІІ Сіноду для Афрыкі, які прайшоў у 2009 г. Ватыканскае радыё выпусціла
кампакт-дыск з 8 творамі афрыканскіх музыкантаў на розных мовах. Адзін з аўтараў –
рэдактар радыё Фелумено Фефіта, які грае і спявае на сваёй роднай мове – кісуахілі.
Змест усіх твораў перагукоўваецца з тэмай Сіноду “Касцёл Афрыкі – на службе прымірэнню,
справядлівасці і міру.”
Дырэктар Ватыканскага радыё ксёндз Фэдэрыко Ламбардзі
падчас нядаўняй прэзентацыі кампакт-дыска ў Рыме адзначыў, што яго выпуск паказвае
канкрэтнае жаданне ажыццяўляць рашэнні Сіноду. У творы ўключаны таксама галасы Бэнэдыкта
XVІ, Яна Паўла ІІ і Паўла VI.
Кс. Ламбардзі выказаў надзею, што “музычны падарунак”
Ватыканскага радыё ўнясе ўклад у намаганні натхняць афрыканскія народы на працу дзеля
прымірэння і справядлівасці, дапаможа распаўсюджваць Евангелле ў Афрыцы, да чаго заклікаў
падчас свайго апостальскага візіту ў Камерун у 2009 г. Бэнэдыкт XVІ.
5 тысяч
дыскаў будуць спачатку ўручаны ўсім біскупам і прадстаўнікам каталіцкіх радыёстанцый
Афрыкі, а ўжо потым будуць прадстаўлены шырокай аўдыторыі.