“L’Osservatore Romano” пра табліцу з “Ойча наш” па-беларуску
Сённяшняя “L’Osservatore
Romano” змяшчае артыкул аб адкрыцці табліцы з малітвай “Ойча наш” на беларускай мове.
Падзея адбылася 25 кастрычніка ў іерусалімскім кляштары “Pater Noster” на Аліўнай
гары. Газета звяртае ўвагу, што на адкрыцці знаходзілася прадстаўнічая дэлегацыя каталіцкіх
біскупаў з Беларусі на чале з Мітрапалітам Мінска-Магілёўскім арцыбіскупам Тадэвушам
Кандрусевічам.
Ватыканскае выданне адзначае, што з нагоды ўрачыстага адкрыцця
мемарыяльнай табліцы, у Іерусалім была арганізавана спецыяльная пілігрымка беларускіх
католікаў, у якой прыняло ўдзел больш за 150 чалавек. Пасля ўрачыстасці асвячэння
пілігрымы прынялі ўдзел у св. Імшы ў касцёле “Pater Noster”. Як адзначае “L’Osservatore
Romano”, падчас яе арцыбіскуп Кандрусевіч маліўся за 9 млн. жыхароў Беларусі, большая
частка якіх з’яўляецца праваслаўнымі, а католікі складаюць 10%. “Цяпер таксама і яны
могуць маліцца “Ойча наш” на сваёй роднай мове ў месцы, дзе Езус навучыў гэтай малітве”,
- адзначае ватыканскае выданне.