Për Papën, rritja e numrit të popullsisë është faktor zhvillimi.
Në enciklikën “Caritas in veritate”, Benedikti XVI e nxit njerëzimin të mos ketë frikë
nga rritja e numrit të popullsisë. Është – shpjegon - një aspekt shumë i rëndësishëm
i zhvillimit të vërtetë, sepse lidhet ngushtë me vlerat e patjetërsueshme të jetës
e të familjes. Sipas Papës, ta shikosh rritjen e popullsisë si shkak të parë të prapambetjes,
nuk është përfundim i saktë, as në këndvështrimin ekonomik: mjafton të mendosh, nga
njëra anë, për pakësimin e vdekshmërisë foshnjore dhe zgjatjen mesatare të jetës,
që regjistrohen në vendet ekonomikisht të zhvilluara e, nga ana tjetër, për shenjat
e krizës së thellë në shoqëritë, ku vërehet rënia e ndjeshme e lindjeve. Ndonëse mbetet
e detyrueshme t’i kushtohet vëmendje përgjegjësisë në lindjen e fëmijëve, parë si
kontribut i rëndësishëm për zhvillimin e gjithanshëm të njeriut e të njerëzimit, për
Papën Racinger “t’i hapësh, me përgjegjësi morale, rrugën jetës së re, duhet konsideruar
si pasuri shoqërore dhe ekonomike”. Kombet e mëdha – thekson Ati i Shenjtë – mundën
të dalin nga mjerimi edhe falë numrit e aftësive të banorëve të tyre, ndërsa përkundrazi,
Kombet njëherë e një kohë të lulëzuara, po kalojnë sot një fazë delikate paqartësie,
edhe për shkak të djepave gjithnjë më të zbrazët, problem themelor për shoqëritë e
zhvilluara e të kamura.Sipas Papës teolog, pakësimi i lindjeve vë në krizë edhe sistemet
e ndihmës sociale, rrit kostot, pakëson kursimet e, si pasojë, burimet financiare
të nevojshme për investime; kufizon numrin e punëtorëve të kualifikuar e të truve,
për të cilat ka aq shumë nevojë çdo Komb. Përveç kësaj, familjet e vogla krijojnë
rrezikun e varfërimit të marrëdhënive shoqërore e të mungesës së formave të ndryshme
të solidarietetit. Janë situata – shkruan Papa - që flasin qartë për mungesën e besimit
në të ardhmen, e sidomos, për lodhje morale!