Popullsia botërore arrin në 7 miliard vetë: gëzim e ankth njëherësh!
Me gëzim, por edhe me ankth, bota kremtoi sot arritjen e banores më të re të Planetit,
me lindjen e së cilës u kapërcye shifra 7 miliard banorë. Është fjala për një vajzë,
lindur në Azi, ku jetojnë 2/3 e popullsisë botërore, e pikërisht, në Filipine (edhe
pse ndokush ia njeh këtë meritë Indisë). Gjithsesi, mbi kremtimet u ndje fort hija
e trishtuar, shkaktuar nga shpërthimi demografik e jo më pak, nga frika se Toka nuk
do të ketë burime të mjaftueshme për të shuar urinë e gjithë kësaj morie njerëzish! Kombet
e Bashkuara patën paralajmëruar prej kohe se bebja e shtatëmiliardët e Planetit do
të dilte në dritë më 31 tetor: Filipinet qenë vendi i parë, që e kumtoi ngjarjen,
si atdhe i foshnjës: një vajzë me emrin Danika, me peshë 2,5 kilogram, lindur pak
para mesnatës, nën ujvarën e dritave të aparateve fotografike e të telekamerave, në
Jose Fabnella Memorial Hospital, të Manilës. Danika është vajza e dytë e një zonje
me emrin Dalura dhe e partnerit të saj, Florante Komacho. Funksionarët e OKB-së
i uruan mirëseardhjen në botë, me një tortë, mbi të cilën ishte shkruar, me kremë
pastash, natyrisht, 7B që do të thotë “e shtatë bilionta krijesë”. Po vogëloshes
vijojnë t’i vijnë edhe dhurata të tjera, nga bamirës vendas e të huaj. Ndërmjet tyre,
një bursë studimi dhe një paketë ndihmash financiare për prindërit, që të mund të
hapin një dyqan. Për pak Filipinet do ta humbisnin këtë vend kaq të jashtëzakonshëm
në historinë e demografisë botërore! Pothuajse njëkohësisht me njoftimin për Danikën,
edhe në Indi, një organizatë bamirëse kushtuar fëmijëve, njoftoi se në qendrën shëndetësore
të një fshati të Uttar Pradesh, kishte lindur një vajzë, banorja e shtatëmiliardët
e Planetit. Quhet Nargis. Lindi në orën 7.20 me orën vendase.Gjithsesi, ky nder i
mbeti Filipineve, vendi i 12-të më i populluar në botë, me 94,9 milionë banorë, ndërsa
India është i dyti, me 1,2 miliardë.