Papa në Asizi: kurrë më dhunë, luftë, terrorizëm!

Pas veprimtarive të paradites, të pranishmit u ftuan për një drekë të shpejtë, krejt të thjeshtë, në mensat e kuvendit të Shën Marisë së Engjëjve. Pasoi një kohë heshtjeje, kohë reflektimi e lutjeje personale. Secili delegat kishte në dispozicion një dhomë në vete në shtëpinë e shtegtarëve, pranë Kuvendit të Shën Marisë së Engjëjve.
Rreth orës 13.45 të rinjtë u vunë për udhë nga Bazilika e Shën Marisë së Engjëjve, kah Sheshi i Shën Françeskut, ku zunë menjëherë vendin, që u ishte caktuar. Në sa arrinin delegacionet, Sheshi ushtonte nga koret Gen Verde, Gen Rosso, kori dioqezan dhe ai ndërfrançeskan, që pasuan njëri tjetrin me këngë e valle.
Ati i Shenjtë dhe kryetarët e delegacioneve dolën në këmbë nga porta e Bazilikës së Shën Marisë së Engjëjve, në Sheshin e Los Anxhelos, ku zunë vend në minibuse, për të arritur pastaj, në Sheshin e Shën Françeskut, në majë të kodrës, pranë Bazilikave madhështore të Shenjtit.
Në orën 16.30 nisi takimi përfundimtar. Përshëndetjen e hapjes e mbajti kardinali Toran, kryetar i Këshillit Papnor për Dialogun Ndërfetar. Menjëherë pas tij, u përsërit impenjimi solemn për paqen, duke nisur nga Bartolomeu I, Patrik Ekumenik, kryepeshkop i Kostandinopojë, për të vijuar me përfaqësuesin e Federatës Luterane Botërore; përfaqësuesin e Sikhve; Hirësinë e Tij, Aleksandër, përfaqësues i Patriarkanës së Moskës; delegatin e Besëlidhjes Botërore Batiste; atë mysliman; budist, rabinin hebre, përfaqësuesin e Bashkimit Botëror të Kishave të Reformuara dhe përfaqësuesin e jo besimtarëve.
Kurrë më dhunë, kurrë më luftë; kurrë më terrorizëm! Në emër të Zotit çdo fe të sjellë mbi tokë paqe e drejtësi, falje e jetë, mirësi e dashuri” - me këto fjalë Benedikti XVI përfundoi përtërtijen e zotimit solemn për paqen.
Pastaj Ati i Shenjtë iu drejtua përfaqësuesve të feve botërore me fjalët: “Në përfundim të kësaj dite, të ngarkuar me veprimtari, dëshiroj t’ju falënderoj ju të gjithë. U shpreh mirënjohjen time posaçërisht atyre, që e bënë të mundur takimin e sotëm. E në në mënyrë të veçantë, falënderoj atë, që na mikpriti përsëri: qytetin e Asizit, bashkësinë e kësaj dioqeze, me ipeshkvin e saj dhe bijtë e Shën Françeskut, që ruajnë trashëgiminë e çmuar shpirtërore të Varfanjakut të Asizit. Falënderojmë përzemërsisht edhe të rinjtë, që shtegtuan në këmbë nga Shën Maria e Engjëjve, për të dëshmuar se ndërmjet breznive të reja, janë të shumtë ata, që impenjohen për t’i dhënë fund dhunës e përçarjeve dhe për t’u bërë nismëtarë të drejtësisë e të paqes.

Ngjarja e madhe e sotme tregon qartë se përmasa shpirtërore është elementi kyç për ndërtimin e paqes. Përmes këtij shtegtimi të përbashkët ne mundem të hyjmë në dialog vëllazëror, të thellojmë miqësinë, të heshtim e të lutemi së bashku.

Pasi përsëritëm zotimin tonë për paqen e shkëmbyem me njëri-tjetrin shenjën e paqes, ne e ndjejmë veten të përfshirë edhe më thellë, së bashku me të gjithë burrat e gratë e bashkësive që përfaqësojmë, në shtegtimin tonë të përbashkët njerëzor.

Ne nuk do të ndahemi: do të vijojmë të takohemi, të jemi të bashkuar në këtë shtegtim, në dialog, në ndërmtimin e përditshëm të paqes dhe në zotimin për ngritjen e një bote më të mirë, një bote, në të cilën çdo burrë, çdo grua e çdo popull mund të jetojë në përkim me dëshirat e veta legjitime.

Ju falënderoj me gjithë zemër, që e pranuat ftesën time për të ardhur në Asizi si shtegtarë të së vërtetës e të paqes. E uroj secilin nga ju me fjalët e Shën Françeskut: “Zoti të dhëntë paqe!

Pasoi një çast heshtjeje e reflektimi, që përfundoi me gjestin simbolik të shpërndarjes dhe ndezjes së qirinjve, në sa kori këndonte “Lutjen e thjeshtë”.
Në përfundim të kësaj veprimtarie të jashtëzakonshme, me jehonë në mbarë botën, sepse mbarë bota kishte sot në Sheshin e Asizit, përfaqësuesit e vet më lartë shpirtëror, delegatët i shtrënguan njëri-tjetrit duart: ishte gjesti i paqes, i një paqeje, që përhapte frymën e vet jetëdhënëse në mbarë rruzullimin.
Kremtimi i sotëm i “Shtegtarëve të së vërtetës, shtegtarë të paqes”, nuk mund të mos përfundonte me një këngë, tingujt e së cilës shoqëruan gjithë veprimtarinë: me Këngën e Krijesave, kënduar nga kori i dioqezës së Asisit. Po nesër Papa do të takohet përsëri me delegacionet pjesëmarrëse në Ditën e sotme të Dialogut. E, pas takimit, në Sallën Klementine, në Vatikan, përfaqësuesit e feve të botës do të ulen rreth një sofre të përbashkët, në Sallën vatikanase të Palit VI, mysafirë të Sekretarit të Shtetit të Shenjtërisë së tij, kardinalit Tarçizio Bertone.