2011-10-26 13:23:06

Հայաստանէն Դուրս Ամենամեծ Եկեղեցին Կ՛օծուի։


Մոսկուա- Հայաստանի նախագահ Սերժ Սարգսեան, որ Հոկտեմբեր 23ին պետական այցով մեկնեցաւ Մոսկուա, իր կնոջ՝ Ռիթա Սարգսեանի եւ Ամենայն հայոց կաթողիկոս Գարեգին Բ.ի հետ մասնակցած է Մոսկուայի մէջ Հայ առաքելական եկեղեցական նորակառոյց համալիրի Մայր տաճարի գմբէթի խաչերուն օրհնութեան եւ օծման արարողութիւններուն:
Մոսկուայի կեդրոնը կառուցուող հայկական եկեղեցական համալիրը կը գրաւէ 1.32 հեքթար տարածք: Շինարարական բուն աշխատանքները սկսած են 2006ին։ Համալիրը կ՛ընդգրկէ Մայր տաճարը, Ս. Խաչ փոքր եկեղեցին, առաջնորդարանի շէնքը, կրթամշակութային, վարչական եւ հիւրանոցային մասնաշէնքերը, հանդիսութիւններու եւ հիւրասիրութիւններու սրահները եւ թանգարանը: Համալիրը ազգային ճարտարապետական կանոններուն համապատասխանող կառոյց է, որուն մասնաշէնքերը կառուցուած են բաց ծիրանագոյն, իսկ Մայր տաճարը՝ վարդագոյն տուֆով՝ բերուած Անի քաղաքէն: Համալիրին զարդը տուֆակերտ Մայր տաճարն է՝ գօտեւորուած խաչերով, զարդաքանդակներով ու Մեսրոպեան գիրերով: Համալիրի շինարարական աշխատանքները աւարտած են, եւ այժմ կը կատարուին Մայր տաճարի եւ մասնաշէնքերու ներքին յարդարման աշխատանքները:








All the contents on this site are copyrighted ©.