Генерал Ордэна Братоў Меншых скіраваў ліст Бэнэдыкту ХVI
З нагоды экуменічнай
сустрэчы ў Асізі, якая пройдзе 27 кастрычніка, Генеральны настаяцель Ордэна Братоў
Меншых, айцец Хасэ Радрыгес Сарбалло скіраваў да Бэнэдыкта ХVI спецыяльны прывітальны
ліст, у якім падкрэслівае цесную сувязь, што існуе паміж тэмай сустрэчы: “Пілігрымы
праўды, пілігрымы міру” і постацю св. Францішка Асізкага. “Вітаем у Асізі, горадзе
міру, духоўнай арцы, у якой усё чалавецтва знаходзіць прытулак”, - піша кіраўнік ордэну.
Айцец Сарбалло дзякуе Святому Айцу за жаданне працягнуць традыцыю, якую пачаў бл.
Ян Павел ІІ 25 гадоў таму. “Гэты Дзень малітвы за мір у свеце з’яўляецца Божым дарам,
дарам аб якім мы заўсёды павінны маліцца”, - адзначае айцец Сарбалло.
Кіраўнік
Ордэна Братоў Меншых дзякуе Пантыфіку за тое, што малітва за мір пройдзе ў Асізі,
у горадзе св. Францішка, які быў вестуном міру і прымірэння. “З яго бяруць сёння прыклад
тыя, хто імкнецца захаваць ідэалы міру, павагі да навакольнага асяроддзя, весці дыялог
паміж людзьмі, рэлігіямі і культурамі”, - падкрэслівае айцец Сарбалло. Паводле францысканца,
гэта нагадвае нам аб тым, што мір заўсёды неаддзельны ад праўды і калі мы яшчэ не
асягнулі яго, павінны адчуваць сябе як пілігрымы на шляху да яго. “Гэта нагадвае аб
міры як нашым заданні, якое мы ўсе павінны прыняць”, - адзначае ў сваім лісце кіраўнік
Ордэна Братоў Меншых.
Айцец Сарбалло запэўніў Святога Айца, што францішканская
супольнасць будзе стала маліцца за мір і прымірэнне ў свеце па прыкладзе св. Францішка,
“каб любоў перамагла нянавісць, мір насілле, тыя, што сумневаюцца паверылі, там, дзе
існуюць памылкі запанавала праўда, а прабачэнне перамагло злачынства”.