Atë Federiko Lombardi: “Viti i fesë” një nismë karakterizuese e kësaj papnie
Javën e kaluar, Papa Benedikti XVI shpalli Vitin e Fesë. Në Letrën Apostolike “Porta
Fidei”, Ati i Shenjtë i fton katolikët të vihen për udhë drejt Jezu Krishtit. Porta
e fesë – shkruan Papa – është gjithnjë e hapur edhe për ata njerëz, të cilët, megjithëse
nuk e kanë dhuratën e fesë, janë në kërkim të vazhdueshëm e të sinqertë të kuptimit
të jetës. Viti i Fesë do të fillojë më 11 tetor 2012 dhe do të përfundojë më 24 nëntor
2013. Editoriali i sotëm i zëdhënësit të Selisë së Shenjtë, atë Federiko Lombardi,
i kushtohet pikërisht këtij argumenti: “Viti i fesë, i cili u shpall gjatë
ditëve të kaluara nga Papa, duhet të konsiderohet një nga nismat karakterizuese të
kësaj papnie. Ashtu si shkruhet në letrën përkatëse, që në frazat e fillimit, kujtesa
shkon menjëherë në fjalimin e parë të Papës së ri në Kapelën Sikstina, në paraditen
pas zgjedhjes, kur pohonte “nevojën për të rizbuluar rrugën e fesë e për të vënë në
dukje gjithnjë e më qartë gëzimin e entuziazmin e rinovuar të takimit me Krishtin”.
E shkon më pas edhe në frymëzimin, që ishte në qendër të të gjitha fjalimeve gjatë
udhëtimit të fundit në Gjermani e në themelimin e Dikasterit për nxitjen e Ungjillëzimit
të Ri. Me intuitën e tij frytdhënëse, Papa e lidh ngushtë Vitin e fesë
me 50-vjetorin e Koncilit II të Vatikanit. Ndërsa Koncili vazhdon të jetë objekt diskutimesh,
na duket e drejtë që leximi e interpretimi i trashëgimisë së tij të pasur, zbatimi
i tij në praktikë nga i gjithë populli i Zotit në përmasat e ndryshme, të vazhdojë
të udhëhiqet me mençuri nga Papa, ashtu si edhe është thirrur e udhëhequr nga Papët
që në fillim, duke shërbyer si “busull” për rrugën e Kishës. Por, Benedikti
XVI kujton edhe 20-vjetorin e publikimit të “Katekizmit të Kishës Katolike”, vepër
e një guximi të pabesueshëm, dashur me forcë nga Gjon Pali II si besnikëri ndaj Koncilit,
për ta shpallur sot fenë sa më plotë, sa më qartë e sa më mirë të jetë e mundur. Pikë
referimi e çmuar, që kardinali Racinger i atëhershëm e njeh fort mirë, pasi ka pasur
rol vendimtar në të. Por Viti do të jetë sidomos një etapë e re në një
histori, në atë rrugë të gjallë, që vjen nga larg, që nga krijimi i botës, nga Abrahami
e Moisiu, nga Davidi e profetët, nga ai “numër i madh dëshmitarësh”, për të cilët
flet Letra drejtuar Hebrenjve (kap. 11-12), në vazhdën e të cilëve vepruan Maria,
apostujt, martirët e shenjtorët. Në këtë rrugë, Papa na thërret edhe ne, e na këshillon
“ta mbajmë gjithnjë vështrimin të ngulur tek Jezusi, autor e perfeksionues i fesë”
(Heb 12,2). E ç’gjë më të rëndësishme se kjo duhet të na thotë bariu i Popullit të
Zotit në udhë?”