Պենետիկտոս ԺԶ Սրբազան Քահանայապետի Գործունէութիւնը

Ուրբաթ 21 հոկտեմբեր 2011 առաւօտեան ժամը 11ին Նորին Սրբութիւնը իր գրասենեակի մէջ ընդունեց նորանուանուած Հոլլանտայի դեսպան Տիար Ժոզէֆ Ուէթերինկս որ ներկայացուց իր հաւատարմագրերը։
Ժամը 11.30 Սրբազան Քահանայապետը ունկնդրութիւն շնորհեց Ավստրալիոյ Եպիսկոպոսական Համահաւաք դասի եպիսկոպոսներուն որոնք Հռոմ կը գտնուին հնգամեայ կանոնական այցելութիւնը կատարելու Սուրբ Պետրոսի յաջորդին։ Իսկ յետմիջօրէի ժամը 18 ին Պենետիկտոս ԺԶ Սրբազան Քահանայապետը ընդունեց Կարտինալ Ժոզէֆ Ուիլլիամ Նեվատան` Հաւատոյ Վարդապետութեան Ժողովի Նախագահ։


Պենետիկտոս ԺԶ Քահանայապետի Ի Պատիւ Համերգ ։
Շաբաթ 22 հոկտեմբերին երեկոյեան Վատիկանի Պօղոս Զ. անուան սրահին մէջ Պենետիկտոս ԺԶ Քահանայապետի ներկայութեամբ Պավարիայի Օբերան Նորին Սրբութեան ի պատիւ համերգ մը պիտի գործադրէ։ Շուրջ 100 երաժշտագէտներ պիտի մեկնաբանեն թիւ 9 սենֆոնի Ռէ Մինոր եւ Պրիւքների Te Deum գոհաբանական աղօթքը։ Այդ առթիւ Պօղոս Զ սրահը պիտի հիւրընկալէ ՕՏԻ կոչուած 16-27 տարեկան երիտասարդ երգչախումբը որուն ծախսերը հոգացած է Օտի գերմանական ինքնաշարժի ընկերութիւնը։