Në 33 vjetorin e Papnisë së Gjon Palit, Berisha: Frymëzim për popujt e shtypur.
Ambasada polake në Tiranë në 33 vjetorin e Pontifikimit të Papa Gjon Palit II ka celur
një ekspozitë fotografike në qendrën sociale ‘Don Bosko’ në Tiranë.
Ekspozita
përmban 70 fotografi gjatë momentit të dhimbjes së madhe të Papës në momentet e fundit
të jetës si dhe përjetimit të njerëzimit për humbjen e tij.
Gjatë fjalës së
saj në këtë event ambasadorja polake Irena Tatarzynska, u shpreh se Papa nuk ka vdekur,
por ai jeton në kujtimin e njerëzve.
“Këto fotografi kanë ardhur nga vende
të ndryshme. Miliona njerëz e kanë përjetuar me dhimbje të madhe vdekjen e Papës në
2 prill 2005. Papa nuk ka vdekur, ai jeton me ne, jeton mes popujve ka shkuar një
qytetar në librin e ngushëllimeve”,- theksoi ambasadorja polake.
Kryeministri
i vendit Sali Berisha u shpreh se 33 vjetori i Pontifikimit është një ditë përkujtimore
për mbarë njerëzimin. Berisha solli në kujtesën e tij vizitën që Gjon Pali i II, kreu
në Shqipërinë post komuniste.
“Ajo vizitë pati një simbolikë të vecantë. Ne
aeroportin e Tiranës pata fatin ta pres me Nënë Terezën, dhuratën më të madhe që kombi
shqiptar i ka bërë njerëzimit në të gjitha kohërat. Kjo ishte dita e lumturimit më
të madh tokësor të Nënë Terezës. Në takimin e parë me atin e shenjtë në vitin 1991
do më rrëfente se ai lutej cdo ditë për Shqipërinë. Askush asokohe nuk kishte ndjekur
më me vëmendje tragjedinë e madhe të shqiptareve nën regjimin e Enver Hoxhës. Ishte
lutur cdo ditë për shqiptarët. Por, thirrjet e tij në Pulia ishin frymëzim i madh
në fillim të viteve 80 pasi do të njoftonte qytetarët e këtij vendi të zhytur në izolimin
më të thellë se ata nuk janë të harruar”,- kujtoi Berisha.
Kreu i ekzekutivit
e cilësoi Papa Vojtilën si burim frymëzimi për kombet e shtypura, ndërsa thirrja e
tij ‘mos kini frikë’ do mbetej thirrje e përjetshme për liri, theksoi Berisha.
“Papa
Gjon Pali II udhëhoqi jo vetëm kishën katolike, por frymëzoi popujt e shtypur të Europës
në përpjekjet e tyre për liri dhe dinjitet njerëzor. Mesazhi i tij hyjnor, drejtuar
polakëve por jo vetëm, të gjithë popujve të shtypur, mos kini frikë, do mbetet thirrje
e pëjetshme për liri, për të gjithë ata që vuajnë nga regjime shtypëse dhe barbare.
Por për shqiptarët Papa Gjon Pali është një nga miqtë më të mëdhejtë dhe të çmuar
në tërë historinë kombëtare”,- nënvizoi kryeministri.
Në fund të ceremonisë
kryeministri nuk ka dashur tu përgjigjet interesit të gazetarëve në lidhje me replikat
më të fundit Topi-Topalli. “Sot jam në nderim të njërit të burrave më të mëdhenj
të të gjitha kohërave”,- komentoi Berisha. (e.m/BalkanWeb)