Ատրպէյճան Սահմանի Երկայնքով Պաշտպանական Պատ Կը Կառուցէ։
Ատրպէյճանը ԼՂ Պաշտպանութեան բանակի զօրքերուն հետ սահմանի երկայնքով պաշտպանական պատ
մը կը կառուցէ: Ատրպեճանական լրատուամիջոցները կը յայտնեն, որ ԼՂՀ Մարտակերտի շրջանին
սահմանակից Չըրաղլի գիւղին մօտ արդէն կառուցուած է երեք մեթր բարձրութեամբ եւ 2700 մեթրանոց
պատ: «Հայ դիպուկահարներէն պաշտպանուելու» նպատակով, սահմանի երկայնքով պատ կառուցելու
գաղափարը Ատրպէյճանի մէջ կը քննարկուի 2006էն ի վեր: Պատի կառուցման կողմնակիցները կը
կարծեն, որ այդ քայլը հոգեբանական նշանակութիւն պիտի ունենայ եւ «պիտի ստիպէ ատրպեճանական
հասարակութեան յիշեցնել, թէ ո՛վ է իր հարեւանը»: Նշենք, որ հակամարտող ժողովուրդները
պատով անջատելու կամ հակառակորդներէն պաշտպանուելու նպատակով, երկրի սահմանները պարսպապատելու
նախադէպերը յայտնի են հնագոյն ժամանակներէն ի վեր: Հին աշխարհէն նման ամենայայտնի օրինակը
Չինական Մեծ պատն է: Նորագոյն ժամանակներէն ամենայայտնին՝ Պաղ պատերազմը խորհրդանշող
Պերլինի պատն էր, որ քանդուեցաւ 1989ին: Նաեւ Իսրայէլի պետութիւնը կը շարունակէ 2003ին
սկսած եւ մինչեւ ութ մեթր բարձրութեան հասնող պատին շինարարութիւնը՝ Յորդանան գետի արեւմտեան
ափին, որով կը փորձէ պաշտպանուիլ պաղեստինցիներէն: Պատը փաստացի սահման կը հանդիսանայ
Իսրայէլի եւ Պաղեստինի միջեւ: